BASEBETSI BA ROBELI BA FELLOA KE MOSEBETSI THABA-TSEKA
Ka Moipone Makhemeng
La 31 Motšeanong 2023
Ke basebetsi ba robeli ka kakaretso ba lahlehetsoeng ke mosebetsi kajeno seterekeng sa Thaba-Tseka kamora ho koaloa hoa khoebo e bitsoang – Fam Pizza.
Fam Pizza ke khoebo e rekisang lijo, lino le mothamahane. E boetse e na le lekala Mokhotlong empa lona ha le rekisi joala. Lekalana le koetsoeng le ne le fumaneha haufi le Sepetlele sa Paray, Thaba Tseka.
E bile mesaralo kajeno ha khoebo ena e koaloa ka potlako kamora hore monga eona monghali Rampoi Matete a fumane taelo ho tsoa ho sepolesa ka tlhaloso ea hore khoebo ea hae e lutse ka thoko ho molao oa matlo a thekiso ea mothamahane kaha e le pela sepetlele.
Monghali Matete puisanong le moqolotsi oa rona o bontša hore tlhaloso e ne e re khoebo e rekisang mothamahane e loketse hore e-be thoko ho sepetlele kapa sekolo ka bonyane limithara tse 500.
Leha ho le joalo, o supa hore pele ba ka hloma khoebo ea bona, ba ile ba kopana le baitlami bao e leng baokameli ba sepetlele ho shebisana tsela ea tšebetso e le ho qoba ho hatana litorong.
O re ba ile ba fihlela litumellano tseo hamorao ho ileng hoa utloahala ha mookameli oa sepetlele a li tjebetse matjoing.
Ho feta mona, Matete o supa hore se makatsang ke hore ho na le matlo a thekiso ea mothamahane a ‘malloa a fumanehang haufi le sepetlele empa leha ho le joalo ‘ona h’a koaloa.
Ho feta mona, menyenyetsi e kuma ha sepetlele ka bosona se ntse se na le khoebo ea baeti (guest house) ebile khoebo eo e rekisa lijo le mothamahane.
Ho sa le joalo, koranta e ile ea ba le puisano le bookameli ba sepetlele ‘me bookameli ha bo ntša lehlakore bo bontšitse hore sepetlele ha ho na moo se leng khahlanong le khoebo ea Fam Pizza.
“Bookameli ba Fam Pizza ke bona bo tlileng ho rona ho kopa hore na ba ka bula khoebo ea bona. Eaba re ba eletsa hore ba shebe hore na policy e reng mabapi le ho bula khoebo ea joala haufi le sekolo kapa sepetlele.
“Eaba bona ba isoa ka mane ka ofising ea setereke ba fuoa litlhaloso ka teng. Rona ba tlile ho rona feela ba re botsa hore na re na le bothata ha ba bula khoebo e joalo eaba re bontša hore na melao e reng, ‘me eona ba e fuoe ka mane ka seterekeng.
“Taba e teng ke hore ntlo ea thekiso ea joala ha e ea lokela ho ahoa haufi le sepetlele kapa sekolo ke ntho e tsejoang e entseng hore ba isoe ka mane ka seterekeng.
“Molao ke oona o hananang le hore khoebo ea joala e ka ba mono.
“Ntlheng ea hore sepetlele se na le guest house mona e rekisang joala, a se ‘nete hohang, ebile hona ke tšenyo ea lebitso.” Moitlami ea buileng lebitsong la bookameli ba sepetlele o rialo feela a sa batle ho tsejoa ka lebitso.
