LLC E IPILETSA HO ‘MUSO HO SIRELETSA MESEBETSI
Ka Moipone Makhemeng
La 23 Motšeanong 2023
Lekhotla la Bosebetsi (Lesotho Labour Council – LLC) le bile le ‘moka oa bophatlalatsi kajeno Mandlebe, Maseru moo le entseng boipeletso ho ‘muso ka tšebelisano-‘moho le balekane bohle sechabeng ho kopana, ka sepheo sa ho pholosa mesebetsi ea Basotho.
Hape ba ipiletsa hore sechaba se theheloe mesebetsi kaha tlokotsi e se tjametseng ke hore basebetsi ba likete li mashome a mabeli (20 000) ba lahlehetsoe ke mesebetsi ho tloha selemong sa 2019 hofihlela joale.
Mongoli-kakaretso oa LLC, Paul Sematlane o bontšitse hore tahleho le tlhokahalo ea mesebetsi ke qholotso e kholo haholo moruong oa naha.
Sematlane o totobalitse hore e le mokhatlo ba tšoela ka sehlethelahali sa mathe lipolaeano tsa baahi ba se nang molato, empa leha ho le joalo a re ba tšoenyehile haholo ke phatlalatso ea nako e sa tsejoeng ea ho khinoa hoa metsamao.
A re sena se ka tlisa litholoana tse bosula ho boemo bo tetemang ba moruo oa naha.
Makatleho Mokone
Monaheng Makaoane
Paul Sematlane
Robert Mokhahlane
Thabo Tema le Katleho Koali
Ho feta mona, o bontšitse ba tšoenyehile haholo ke mekhoa ea ho rarolla liqabang e bonahalang e le lesisitheho makhotleng a bosebetsi joaloka Lekhotleng la Namolo ea Likhang tsa Basebetsi (Directorate of Dispute Prevention and Resolution – DDPR) ekasitana Lekhotleng la Bosebetsi (Labour Court) moo teng a bontšiseng likahlolo tsa linyeoe tse ngata tsa ho lelekoa hampe mosebetsing hoa basebetsi, li ntseng li tsoela-pele mo-sa-feleng.
Ho feta mona o bontša ha linyeoe li qetella li sa kene ka lebaka la ho khaoloa hoa motlakase ‘me likahlolo tsa linyeoe li sa fihleloe.
Monghali Monaheng Mokaoane ho hlaha Lentsoe la Sechaba ha a akhela molangoana, o supile hore ‘muso ho na le ho khina motsamao oa sechaba o ne o ka tiisa mekhoa ea tšireletso ka ho eketsa sepolesa le ho se rekela thepa ea mosebetsi ho kenyeletsa likoloi hara tse ling.
O ile a boela a supa hore mapolesa, mautloela le masole a ka kena letšolong la ho tsamaea har’a metse ho netefatsa hore sechaba se bolokehile. A thatiselletsa ka hore hafeela ba ntse ba lula likantorong tsa bona metebong, litlolo tsa molao ha li na ho fela.
A tiisa hore ba loketse hore ba kene har’a metse kaha ke oona feela mokhoa oo botlokotsebe bo ka fenngoang.
Ho sa le joalo, monghali Thabo Tema oa mokhatlo o bontšitse hape hore merafo ea Lesotho e lula e fumana majoe a hlolang a boleloa hore a maholo empa leha ho le joalo a re basebetsi ba merafo ba ntse ba sebetsa tlas’a maemo a sa jeseng litheohelang.
O bontša hore majoe a maholo ao, a kenyetsa ‘muso chelete e ngata ka thoko ho majoe a lulang a fumanoa letsatsi le letsatsi.
Ho feta mona, monghali May Rathakane ha a nyenyeletsa holima litaba tse tekiloeng ke oa mphato oa hae monghali Tema, o bontšitse hore polokeho ea bophelo bo botle ha e eo merafong.
Moo teng a ileng a lokolisa bafu ba bileng teng hona merafong ba le tšebetsong empa a lla ka hore ‘muso ha o e-s’o etse letho leha e le ho eketsa bahlahlobi ba mesebetsi bao a bontšitseng ba supile (7) feela ka palo ka hare ho naha literekeng tse leshome. O re le bona ha ba khone ho finyella ka merafong kaha ba fokola ba sa khone ho potoloha le naha ka bophara.
