NAMANE LE KOBELI BA NYEKENYA MONNA KA LITHIPA
Ka Moipone Makhemeng
La 22 Motšeanong 2023
Leboea Namane (23) ‘moho le Tomane Kobeli (23) ba Ha Lekhobanyane, Maseru ha morena oa sehlooho Seeiso Bereng Seeiso, ba hlahile lekhotleng la ‘maseterata Maseru ba qosoa ka polao ea motho ka maikemisetso.
Ho ea ka lengolo la qoso, bobeli baqosuoa ka la 28 ‘Mesa 2023 hona Ha Lekhobanyane ka morero o le mong ebile e le ka maikemisetso ba ile ba loantša e mong Mahlabanyane Tuoane. Ke ntoeng ena moo ba ileng ba mo hlaba ka lithipa le ho mo ntša likotsi tse ileng tsa baka lefu la hae.
Kamor’a ho balloa qoso, baqosuoa ba ile ba bontša ba utloisisa qoso e ba tjametseng ‘me ba eletsoa ka litokelo tsa bona tsa molao hore ba ka iphumanela babuelli ba ‘muso kapa ho iphumanela ba khetho ea bona.
Nyeoe e ka pele ho ‘Maseterata ‘Makopano Rantšo athe mochochisi ke mohlomphehi Motiki ‘me baqosuoa ba tla boela ba hlaha kapela lekhotla ka la 30 Motšeanong 2023.
Hajoale ba tla tsoa ba le polokelong ea batšoaruoa.
