MOLAOLI OA LDF MOZAMBIQUE O TLOSITSOE
Molaoli ea neng a laola lebotho la sesole sa Lesotho Mozambique, Commando Colonel Tefo Ramosie o ile a hloka boikhethelo ha lesole le qosoang ka ho hana litaelo tsa bolaoli, Corporal Tšitso Mahase a re Ramosie a tebeloe nyeoeng ea hae.
Kamora ho khutla ntoeng Mozambique, Commando Colonel Ramosie o ile a fuoa mosebetsi ke bolaoli ba sesole ho okamela lekhotla la sesole moo ho qosoang Corporal Mahase ka ho nyelisa litaelo tsa bolaoli.
Ha nyeoe e tsoela-pele, Corporal Mahase o ile a re h’a batle ho bona Ramosie nyeoeng ea hae kaha a re ka 2015, Ramosie o ne a mo tokhotse ba le Setibing nakong eane eo masole a neng a tšoeroe ka hore a batla ho liha bolauli ka nako eo, ha ho tla bolaoa Brigadier General Maaparankoe Mahao ke masole.
Mahase o tjametsoe ke qoso ea ho hana ho ikobela litaelo tsa baokameli ba hae empa khang ea hae ke hore o sitoa ho ikobela tse ling tsa litaelo tsa bookameli kaha a holofalitsoe ke eena Coomando Colonel Ramosie joale o makala kajeno ha eena Ramosiee a se a mamela nyeoe ea hae feela e le eena ea mo holofalitseng.
Akhente ea Corporal Mahase, Adv. Tšolo Kalake o ile a kopa lekhotla hore le tlose Colonel Tefo Ramosie e le moahloli nyeoeng ena.
“Ha nyeoe e tsoela-pela re tlo bontša mona hore moqosuoa a ke ke a phetha mesebetsi e meng ea sesole; re na le bopaki ba lingaka ho netefatsa seo. Re tlo hloma lipaki tseno lipotso e le ho bontša hore ehlile moqosuoa o ne a ke ke phetha litaelo tseno.
“Re tlo bontša hape hore Commando Colonel Ramosie o kentse letsoho hore ebe moqosuoa o khobetse kaha a ile a mo tokhotsa ka 2015.” Ho rialo Adv. Tšolo Kalake.
Ho sa le joalo, Ramosie o ile a lumela ho ikhula nyeoeng ena a re: “Kaha seo re se batlang ke toka ho moqosuoa, ke entse qeto ea ho ikhula nyeoeng ena.” Ke Ramosie a lumela kopo ea Corporal Mahase hore a emelle ka thoko nyeoeng ena.
– Newsday
