BA BOLAILENG KA SABOLE BA FUOA KAHLOLO HOSANE
Ka Moipone Makhemeng
La 26 ’Mesa 2023
Banna ba babeli ba Hlotse, Leribe ebile e le bana ba motho, Sechaba Mafisa le Motobetsane Mafisa ba hlahile Lekhotleng le Phahameng Maseru kapele ho moahloli Tšeliso Mokoko kajeno ka qoso ea polao ea e mong Teboho Motlotlo oa hona Hlotse e etsahetseng ka la 25 ‘Mesa 2019.
Ho ea ka bopaki bo tekiloeng, ho utloahala ha ka letsatsi le boletsoeng, mofu a ile a khakhatha ka molamu Sechaba e leng e mong oa baqosuoa ‘me eo a ba a lahleheloa ke meno.
Sechaba o teketse lekhotla hore mofu e ne e le motsoalle oa hae ‘me ba ne ba ntse ba tsamaea ‘moho ebile ba inoella mothamahane. O bolelletse lekhotla hore ke mofu ea ileng a mo khorohela a mo khakhatha feela ba sa ba le qoaketsano ea letho.
Ha a tsoela-pele o bontša ha kamora moo bana ba bo ba ile ba fihla ho mo namolela ho eena mofu moo teng ba ileng ba mo khakhatha ka mabetlela makhetlo a ka isang botšeleleng ba nt’o tsamaea kaofela ba siea mofu a lutse fatše. O re ke moo eena e itseng ha a fihla hae a ileng a nka sabole ka sepheo sa ho ea iphetetsa ho mofu kaha a ne a mo ntšitse meno.
Leha ho le joalo, ‘muelli oa mofapa-hlooho, Adv. Sentle Rathebe o ile a qhela taba ena ka hore moqosuoa o ne a na le maikemisetso a ho bolaea mofu kaha bopaki bo tekiloeng kapele ho lekhotla ke paki ea pele le ea bobeli bo totobalitse hore mofu o ne a se na lebetlela. Ho feta mona, ba bone ka mahlo ha eena Sechaba a phekha mofu ka sabole.
Adv. Sentle Rathebe, ‘muelli oa mofapa-hlooho
Adv. Rathebe ha a tsoela-pele o behile kapele ho moqosuoa hore o ile a utluoa ke lipaki a buoa mantsoe ana ka molomo oa hae “ema re tlo loana”. O re ke moo ba ileng ba loana eaba mofu o hlola moqosuoa ka matla eaba bana ba babo ba fihla ho mo thusetsa ka ho teteka mofu.
Adv. Rathebe o boetse a beha kapele ho moqosuoa hore paki ea pele le ea bobeli ba bone ka mahlo ha eo a kabaka mofu ka sabole ‘me setopo sa mofu se fumanoe se na le maqeba a mabeli a bulehileng.
Ho sa le joalo, ‘muelli oa moqosuoa Adv. Selloane Fihlo, o ile a bontša ha bopaki bo teketsoeng lekhotla bo sa lekana ho kholisa lekhotla kaha paki ea pele e bontšitse moqosuoa a ne a sebelisa molamu ha ea bobeli e re sabole.
Ho feta mona, o hlaloselitse lekhotla hore o kopa lekhotla le se shebe nyeoe ena e le ea polao ka maikemisetso kaha bao ba ne ba sireletsa ngoan’a bo-bona.
Moqosuoa e mong e leng Motobetsane Mafisa o hlaloselitse lekhotla hore o ile a utloa lerata ha e mong oa hona motseng oo a bontša hore mofu ke eno o katelletse abuti oa hae Sechaba o ntse a mo khakhatha. Ke moo eena le moholoane oa hae ba ileng ba nka mabetlela ba mathela moo ho lo thusa abuti oa bona.
Ha a tsoela-pele o hlalositse ha a ile a tšoha ha a bona abuti oa hae a tsoa mali ke ka hona a ileng a khakhatha mofu ba nt’o mo siea moo a lutse. Ka tsela e tšoanang mochochisi Adv. Rathebe o behile kapele ho Mafisa hore ba ne ba na le maikemisetso a ho timetsa mofu kaha eena Motobetsane a ile a bua mantsoe a latelang ha a qeta ho mo otla lifubeng; “Ha re mo tlohelleng o felile.”
Motobetsane o re ha ba fihla lapeng ha bo-bona Sechaba o ile a nka sabole a re o khutlela morao ho mofu o ilo iphetetsa kaha a sa utloe na eo o mo ntšelitseng meno empa ba sa qabana. O re leha ho le joalo, ba ile ba mo thiba ka thata ho se khutlele ho eena le hoja a ne a itamolla.
Ho sa le joalo, ho utloahala ha e mong Tšoeu oa hona motseng moo a ile a leka ho thusetsa mofu empa baqosuoa ba ile ba mo manakisa ‘me eo a atleha ho baleha a ba a ba nyamella morung. Moahloli o ile a botsa moqosuoa Motobetsane hore na ha e ne eba ba ile ba atleha ho tšoara Tšoeu ba ka be ba mo entseng empa eo a fetola kahore ha a na tsebo. O boetse a mo botsa mabaka a neng a etsa hore ba loantše eo ke afeng ‘me o bontšitse a ne a le sieo.
Moahloli Mokoko ha a lihela khang ena o hlaloselitse baqosuoa hore hosane ka 11:30 hoseng ba be ba le lekhotleng ho tla mamela kahlolo ea bona kaha babuelli ba qetile likhang tsa bona le ho tekoa hoa mapaki.
