BASEBETSI BA LCE BA BEHA LITHEBE FATŠE
Ka Moipone Makhemeng
La 25 ‘Mesa 2023
Basebetsi ba Sekolo sa Koetliso ea Botichere, Lesotho College of Education (LCE) ka mokhatlo oa bona, Lesotho College of Education Staff Union (LECESU) kajeno ba nehelane ka lengolo la boipelaetso ho mookameli oa bona Dr. John Dzimba moo ba tekileng seboko mabapi le tiehiso ea meputso ea bona.
Ba re kamehla letsatsi la ho fumantšoa meputso ke la 20 khoeling e ‘ngoe le e ‘ngoe.
Lihoreng tsa hoseng kajeno basebetsi ba ile ba khobokana mapatlelong a sekolo ba etsa mokoloko ho tekela mookameli Dzimba hore ba tla sebetsa ka monyebe letsatsing lena ha ba ntse ba emetse meputso pele ho tinare. Ba boetse ba hlolosa hore haeba ba e-s’o lefshoe hosane, ba tlo beha lifocholo fatše.
Litho tsa LECESU kajeno
Lengolo la litletlebo le totobalelitse monghali Dzimba hore o hlompholla likonteraka tsa basebetsi le sekolo. “Ha ho bonahale u tseba likhakanyo tsa lichelete bonyane likhoeling tse peli tse tlang, re se re sa re letho ka lilemo tse ‘ne tseo e ka ‘nang eaba u sa na le tsona mona. Re tla u tšepa joang kamoso?” Lengolo le hlalosa joalo.
Lebitsong la LECESU, monghali Maphehelle Mokete e le mongoli-kakaretso oa mokhatlo, a buisana le rona, o bontšitse ha e le nako e telele joale se khitla lejoe nakong eo ba lokelang ho fumana meputso ea bona. O re sena se qalile ngoahola ka Motšeanong, sa ipheta ka Pulungoana ‘me ke sena se ipheta hape kajeno.
Monghali Mokete o supa ha Dr. Dzimba a ba hlaloselitse hore ha a ne a na le mokotla oa chelete a ka be a ba fa eona honajoale, ebile o boetse a ba joetsa hore ba ee Lekhotleng la Koleche joalokaha ba mo teketse hore ke maikemisetso a bona ‘me ke moo ba tlang ho pataloa teng.
Ho sa le joalo Dr. Dzimba ha a fana ka lehlakore la hae ho moqolotsi oa Leihlo la Basotho o itse o ne a sa mamela le ho mamela lillo tsa basebetsi ebile a ke ke a araba lintho tse itlhakisitseng; ‘me hona ke hore ‘muso ha o na chelete.
Dr. John Dzimba, mookameli oa LCE (Photo Supplied)
