MOSEBELETSI OA VODACOM LITLAMONG
Ka Moipone Makhemeng
La 23 ‘Mesa 2023
Koranta ea Leihlo la Basotho e fumane le ho netefatsa hore e mong oa basebeletsi ba Kompone ea mehala ea thekeng, Vodacom Lesotho (VCL) ea sebetsang lebenkeleng la eona Masianokeng Lifestyle Centre o ntse a panya-panya setokising sa motebo oa sepolesa sa Maseru Central Charge Office kamora ho tšoaroa ka Labone la la 20 ‘Mesa 2023.
Mehloli ea litaba e supa ha thena e ikhapetse matsebe-tsebe a lichelete tsa batho tsa MPESA ka bokunyata kamora hore VCL e hlokomele bokhosheli bona. Eka ‘melaelloa o itjelletse lefa la likarate tse ka bang 164 kaofela. Ho utloahala a ne a seha likarete tse bonahalang li na le chelete ka MPESENG empa beng ba tsona ho le nako ba sa li sebelise; ebe kamora ho seha likarete, moeka o tla iketsetsa nomoro ea lekunutu a nt’o ntša chelete e joalo a ikhapele eona. Re tla utloa ha a hlaha lekhotleng hore o qosoa ka ho ikhapela bokae.
Tora ea Vodacom
Bahiri ba hae ba ile ba lemoha bolotsana bona ‘me ba tlalehela sepolesa sa Motebo oa Masianokeng ho etsa lipatlisiso tse tebileng a nt’o qhautsa a koalloa Maseru Central Charge Office.
Kamora ho fumana monyenyetsi ona Koranta e ile ea leba hona motebong oa sepolesa ho ea inoesa ka nkho hore efeela motho ea joalo a le litlamong ‘me sepolesa se netefalitse hore ‘melaelloa ea joalo o tšoeroe le hoja ba ‘muso bao moqolotsi a buileng le bona ba itse ha ba na likateng tsa tšoaro ea hae kaha ba nkileng eo setatemente e le mapolesa a Masianokeng. Ba boetse ba hlalositse hore ‘melaelloa o tla hlaha kapele ho lekhotla la ‘Maseterata Maseru ka Mantaha.
Ho sa le joalo, koranta e boetse ea etsa matsapa ho fumana lehlakore VCL ho utloa likateng tsa tšoaro ea mosebeletsi oa bona empa Monghali Katleho Pefole ea sebetsang ofising ea liphatlalatso o bontšitse hona e le semaka kaha a ne a e-s’o fumane taba e joalo.
O ile a leka ho fumana lehlakore la ba tšireletso empa a se ba fumane. O itse o belaela hore mohlomong bao ba sa sebetsana le taba ena.
