LEKONSTABOLE LE NKA BOIPILETSO
Ka Moipone Makhemeng
La 13 ‘Mesa 2023
Setho sa Lichankana tsa Lesotho, Khama S. Letsie ka ‘muelli oa hae Adv. Letuka Molati o hlahile Lekhotleng la Maipiletso ka Labobeli la la 11 ‘Mesa 2023 khahlanong le Lefapha la Lichankana tsa Lesotho (Lesotho Correctional Services – LCS) moo a batlang hore LCS e mo lefe matšeliso a M500 000.00 kaha a re o ile a lemalla mosebetsing nakong eo makonstabole a neng a le seteraekeng a tseka meputso ka la 22 Motšeanong 2013.
Khama o mathetse Lekhotleng la Maipiletso tjena kaha a ile a hloloa ke nyeoe ena Lekhotleng le Phahameng, moo moahloli Teboho Moiloa a neng a lihe kahlolo khahlanong le eena ka la 16 Pulungoana 2020. Kahlolo ea Moiloa e ile ea lahlela matjoing sello sa Khama a ba a mo laela ho lefa baqosuoa litšenyehelo tsa nyeoe.
Khang ea maipiletso a Khama ebile kapele ho baahloli Kananelo Mosito le Moses Hungwe Chinhengo. Adv. Molati ha a teka lintlha tsa hae holima o hlalositse hore moipelaetsi o ile a lemalla sebakeng sa mosebetsi a lematsoa ke basebetsi ba neng ba sa etse mosebetsi oo ba neng ba loketse ho o etsa e leng oa ho bona hore batšoaruoa ba feptjoa, ho isoa makhotleng le ho hlokomeloa. Molati o re empa ha ba lokela ho etsa mosebetsi oa bona, ba ile ba kena seteraekeng ba bile ba sitisa ba bang ho etsa mosebetsi.
O beile ka pele ho lekhotla hore kamora ho re ‘muelloa oa hae a lematsoe a ne a etsa mosebetsi, mohiri e leng Mokhomishinara oa Lichankana ha a ka a qosa baetsi ba ketso e soto eno kapa hona ho ba biletsa tulong ea khalemo.
Ha a tsoelapele ka khang ea hae, o ipapisitse le lintlha tseo a li tekileng tsa nyeoe eo a reng litho tse ling tsa sepolesa li ile tsa hlekefetsa ngoana ka motabo empa li se mosebetsing ha li ne li lokela hore ebe ke tsona tse sireletsang sechaba ‘me li ile tsa fumana kahlolo. Ha a amantša linyeoe tsena Molati o re ‘muelloa oa hae eena o bile o lemalitsoe ke basebetsi-‘moho ba neng ba le tlas’a taolo ea hae sebakeng sa tšebetso ebile a etsa se nepahetseng.
Adv. Molati o re na ha mohiri a sa lefe ‘muelloa oa hae na see se tlisa thuto ea hore kamoso ha ho na le seteraeke ba bang ba se etse mosebetsi kaha ba tla be ba tseba hore ha ba ka lemala ba ke ke ba lefshoa matšeliso na.
Ho sa le joalo, akhente ea ‘muso Adv. Moshoeshoe o kopile hore lekhotla le thesele kopo ena ka le reng mokopi o lemalitsoe ke batho ba neng ba le ka thoko ho mosebetsi ba le seteraekeng ebile ba sa etse seo mohiri a ba laetseng ho se etsa. A boela a bontša hore molli o loketse a qose ba mo lemalitseng e seng mohiri kaha bao ha ba etsa seo tlas’a litaelo tsa hae. A re sena se tšoana hantle leha ho ne ho ka lematsoa mokhomishinara. A re na o ne a tla qosa kapa a batle ho lefuoa na? Kahona a bontša hore molli ke e mong oa batsamaisi ba chankana ‘me o lemalitsoe ke ba banyenyane ho eena.
Ha a tsoela-pele o bontšitse ha nyeoe ena e ne e ka fapana ha e ne eba ke e mong oa batšoaruoa ba lemetseng.
Qetellong ea khang ena baahloli ba ile ba supa hore ba tla nyakurela mahamo a khang ena ‘me ba fane ka kahlolo ka la 12 Motšeanong 2023.
