MOROMUOA OA SEPOLESA O QOSOA KA BOSHOLU BA KOLOI
Ka Moipone Makhemeng
La 30 Tlhakubele 2023
Molefi Moholi (34) oa Ha Pita Maseru ea sebetsang Ntlo-Kholo ea Sepolesa e le moromuoa ea tsamaisang mangolo o hlahile Lekhotleng la ‘Maseterata Maseru ka la 28 Tlhakubele 2023 a qosoa ka bosholu ba koloi le ho iketsa lepolesa.
Nyeoe e mametsoe ke ‘Maseterata e Moholo ‘Matankiso Nthunya, mochochisi ke Adv. Rabale athe ‘muelli oa moqosuoa ke Adv. Masiphole.
Tlaleho e supa ha monna enoa a ne a ts’oaroe ‘moho le banna ba bane ka la 1 Tlhakubele 2023. Moeka o ile a ea ho e mong Semethe Posholi oa Lithabaneng a ikentse lepolesa a re o lo ts’oara koloi ea Semethe a re o e isa polokelong ea sepolesa kaha e le ea bosholu. O ile a atleha ho e nka empa a e qhoba ha e isa lapeng ha bo, Ha Pita.
Semethe ke e mong oa baqosuoa hoba le eena koloi e hapiloeng ho eena ke Moholi ha se ea hae o ne a e utsoe le baqosuoa ba bang ba babeli, moo a ileng a ba tsoa fats’e a e ngolisa ka mabitso a hae. Banna bana ke ba utsoang likoloi haholo tsa moetso oa Honda Fit ‘me ba li rekisa. Ba tlalehoa hape ba ile ba qhaqha Khubetsoana, Thabong le Lekhaloaneng, Maseru.
Semethe o ile a tlalehela litho tsa sesole ka ketsahalo ea ho nkoa hoa koloi ho eena ke Moholi. Sesole se ile sa etsa liphuputso tsa fumana koloi ha bo-moqosuoa, Ha Pita. Moholi ha a ka hlaha khotla le baqosuoa ba bang pejana kaha e le mohlanka oa ‘muso ‘me ho ne ho sa emetsoe taelo ea Mochochisi e Moholo hore a fane ka tumello ea hore a qosoe.
Lekhotla le mo file beile ea boikaloso ‘me o tla boela a hlaha khotla ka la 21 ‘Mesa 2023.
