MAMOSELEME A KHALEMA LEPHEMA
Leihlo la Basotho News
La 18 Tlhakubele 2023
Mokhatlo oa Tumelo ea Islam Lesotho (Muslim Congress of Lesotho) o kopile letona la Puso ea Libaka le Borena, Lekala la Lehae le Sepolesa, Lebona Lephema ho hula mantsoe a hae ao ba reng a na le lenyatso ho Mamoseleme ekasitana le ho mo khalemella ho hlohloletsa lehloeo le lehlofu mahareng a Basotho ha a re Lesotho ke naha ea Bokreste.
Lephema kopanong ea hae le Marena le Mak’hanselara ka la 7 Tlhakubele 2023 o ne a kope marena ho thibela Masolomane ho aha kapa ho hoeba metseng ea ‘ona. Lephema o bile a amahanya Mamoseleme le thekiso ea batho le bokhukhuni kapa borabele.
Letona le hlalosoa le bile la nyatsa moaho oa Masolomane o Maseru West oo a reng o nyaretse ka ntlong ea tona-kholo (state house) ‘me seo a re se beha tšireletso ea sebaka seo tlokotsing.
Ho sa le joalo, kajeno mokhatlo oa Muslim Congress of Lesotho o ile oa tšoara ‘moka oa baqolotsi ho khalema letona le ho mo ruta ka litšiea tsa Islam.
Lebona Lephema [Foto – Leihlo]
“Mokeng oa marena le mak’hanselara ka la 7 Tlhakubele 2023 moo a neng a hlalosa lintho tse amanang le tumelo ea rona. Kahona re hlaha mona ho phatlalatsa hore o re hlokela toka le ho hatikela litokelo tsa rona tsa mantlha tsa botho.
“Hape o boela a hatikela molao oa motheo oa naha khaolong ea 2 temaneng ea 4 (1). Mona ke moo litokelo tsa rona li sirelelitsoeng naheng ena. Re mona ho tla otlolla, ho ipiletsa le ho fana ka thuto mabapi le litaba tse amanang le tumelo ea Islam le balateli ba eona.
“Litaba tsa rona ke tsena; kamora boinahano bo tebileng re fumane letona la Motlotlehi le loba molao oa motheo oa Lesotho o fang litumelo le bolumeli ba ho phela Lesotho hafeela li sa hatikele molao. Sena se bakile pherekano kahara sechaba kaha sena se supa khethollo. Mohlomphehi o’a fosa ha a kopanya merabe le tumelo ea Islam a li etsa ntho e le ‘ngoe. Tumelo ea Islam ke ea batho bohle ba itellang ho qolla bonngoe ba ‘mopi ho eng kapa eng khumamelong.
“Mosotho e ka ba Lemoseleme, Lechaena e ka ba Lemoselemo. Kahona le morabe oa Ma-India e ka ba mamoseleme. Re lumela hore moo morabe o fosang ha se nepo ho rehella tumelo ea Islam ho liketso tse joalo.
“Ha motho a entse tlolo ea molao; ke motho ea joalo ea entseng tlolo ea molao e seng tumelo ‘me motho ea joalo o lokela a nkeloe likhato tsa molao tse mo lokelang.
“Re hlokomelisa mohlomphehi letona hore a ele hloko hore sebakeng seo a buang ka sona se Maseru West ho na le meaho e ‘meli; e leng ntlo ea thapelo le ea monga rona. Re masoabi ho utloa mohlomphehi a bontša lenyatso ho moaho oa thapelo empa o fanoe ka molao. Hape o bua ka katiba ho bontša ho hloka tsebo ka tumelo ea Islam.
“Re le Mamoseleme re utloisisa hore ekakhona re phele ka khotso re le sechaba ka litumelo tse fapaneng. Mohlomphehi o re naha ena ke ea Bokreste ‘me polelo ena e baka bora lipakeng tsa litumelo.
“E etsa hore tumelo e ‘ngoe e ikutloe e na le matla ho feta tumelo e ‘ngoe. Polelo ea letona e bile ea laela marena le ho se amohele batho ba tumelo ea Islam kahara libaka tseo ba li alositseng.
“Na mohlomphehi oa lemoha hore polelo ee e behile Mamoseleme tlasa tsitsipano? Na re tla be re fosa ha re re mohlomphehi letona o hlohloletsa ntoa ea bana ba thari?
“Mohlomphehi letona o lobile molao ka ho phatlalatsa molao o sieo naheng ena ha a re Lesotho ke naha ea Bokreste. Re maketse hore na ho tla joang ebe letona le khabane le ema kapela sechaba le hlohloletsa lehloeo le ho hatikela molao oa motheo oa Lesotho.
“Kajeno ho hobosoa tumelo ea Mamoselemo ‘me kamoso ho tla be ho nyelisoa tse ling tsa litumelo ‘me sena se tla baka morearea. Tabeng tsa thekiso ea batho le borabele re nyatsa ho utloa mohlomphehi a nyalanya taba tsena le Islam. Tumelo ea rona ha e re lumelle ho etsa joalo.
“Re kopa mohlomphehi a boele sechabeng a lo hula mantsoe a hae le ho kopa tšoarelo ho sechaba sa Mamoseleme ka kakaretso. Re batho ba khotso ‘me re kopela Lesotho khotso.” Nhlapo o li behile joalo.
