LELAPA LE RE SEPOLESA SE ISITSE LEOTO ‘MOSHARENG MONGA LONA A PHELA
Ka Moipone Makhemeng
La 17 Tlhakubele 2023
Lelapa la moqhobi ea neng a qhoba koloi e amehileng kotsing Ha Toloane, Maseru beke e fetileng ka Labohlano, le lla seboko sa phohomela ka leoto la mora lona ea ntseng a phela feela leoto la hae mapolesa a le isitse ‘moshareng.
Kotsing ena batho ba bane ba ile ba timela hang-hang athe ba bang ba ile ba potlakisetsoa sepetlele Scott, Morija ka likotsi tse mpe. E mong har’a bona o ile a fetisetsoa sepetlele se seholo sa Sehopotso sa Mofumahali ‘Mamohato.
Lehlasipa le fetiselitsoeng sepetleleng se seholo sa Sehopotso sa Mofumahali ‘Mamohato ke leo leoto la lona mapolesa a le isitseng ‘moshareng hoba a ne a hopola hore ke la e mong oa bafu. Setho sa lelapa le llang ka leoto puisanong le leselinyana lena maobane le totobalitse ha leoto la mora lona le hlahile ‘moshareng o mong.
Oa lelapa o boletse ha taba ena e sa ba jese litheohelang kaha mor’a bona a ntse a phela lehoja leoto lona le arohane le eena kotsing eo. O hlalositse hore mor’a bona o ne a le boemong bo hlobaetsang ha a tla potlakisetsoa sepetleleng sa Sehopotso sa Mofumahali ‘Mamohato.
Ho utloahala ha leoto leo le ile la batlisoa monga lona empa ha tehoa kalala hore monga leoto ke mang.
Moamani o bontšitse ha tharollo e le hore karolo eo ea ‘mele e chesoe kapa e isoe hona setsing sa kokelo se boletsoeng hore lingaka li bone hore na li ka le sebelisa ho etsa eng. Leha ho le joalo, sepetlele sa Morija se boletse ha se ke ke sa nka boikarabello ntlheng ea ho chesa leoto.
Moqolotsi oa rona o boetse a atamela phala ea sepolesa Senior Superintendent Mpiti Mopeli. Ha a teka lehlakore la sepolesa Mopeli o fane ka keletso e reng lelapa le amehang qakeng ena le lokela ho buisana le sepolesa sa Morija e le hore sepolesa se ba kopanye le bookameli ba sepetlele sa Morija molemong oa ho fumana tharollo.
Ka bomali-mabe, hofihlela hajoale li ntse li eme ka lijoko mabapi le leoto kaha le ntse le le ‘moshareng ha ho e-s’o be le tharollo.
