LIKUENA E TŠABANA BOPHATŠOA LE ESWATINI
La 16 Tlhakubele 2023
Sehlopha sa papali ea bolo ea maoto sa Lesotho – Likuena e sebetsa ka matla ho itlhophela papali ea eona ea mantšano tlholisanong ea mohope oa Africa Cup of Nations moo e tla thulana le Chipolopolo ea Zambia ka la 26 Tlhakubele 2023, Dobsonville Stadium, Gauteng.
Kajeno Likuena e ile ea nkhisetsana mahafi le bahlankana ba Eswatini papaling ea setsoalle lebaleng la Bambatha Tšita.
Papali e ne e le mohato oa boitlhopho le boikoetliso kaha Eswatini eona e tla isana holimo le tlaase le Cape Verde tlholisanong e tšoanang.
Papali ea Likuena le Eswatini
Likuena e ne e panne ka tsela ena:
- Sekhoane Moerane , 2. Rethabile Senkoto, 3. Rethabile Rasethuntsa, 4. Kopano Tseka, 5. Masia Makepe (c), 6. Lisema Lebokollane, 7. Thabang Malane, 8. Thabo Mafatle, 9. Lemohang Lintša, 10. Jane Thabantšo le 11. Rethabile Mokokoane.
Lihlopha bobeli li ile khefutsong li theta lehe ‘me papali e fihlile pheletsong li tšabane bophatšoa ka ho ho thetha lehe bobeli le ka mora pheletso ea papali.
Veseline Jelušiċ, Mokoetlisi oa Likuena
Dominic Kunene, Mokoetlisi oa Eswatini
A bua le baphalalatsi mokoetlisi oa Likuena, Veseline Jelušiċ, o itse ba lekile ho hlasela hore ba akhele lintlha empa ba hlolehile. A re leha ho le joalo ba ikemiselitse ho tla le tlholo khahlanong le Zambia. A supa hore ke hona e le bakoetlisi ba tlo khetha mokhethoa oa moshoelella ho ea khahlana le Zambia.
Ehlile re bapala hore re hlole lipapali tsena. Rea tseba Zambia ke sehlopha se matla empa re tlo bapala re leke tsohle tse matleng a rona ho hlola papali ena.” Jelušiċ o rialo.
Ka lehlakoreng le leng mokoetlisi oa Eswatini, Dominic Kunene, o itse papali e bile ntle ‘me ba thabetse ho fumana boikoetliso bo botle kaha bona ba ilo thulana le Cape Verde. A supa hore sehlopha sa Lesotho se ntlafetse haholo ka ‘mapalo papisong le lilemo tsa ho feta. A toboketsa hore mola o kamorao oa Likuena o ne o setletse.
