‘MUSO O KHALEMA SESOLE
… O RE LIKETSO TSA SONA LIA SOABISA
Ho utloahala poboli ea sechaba ka tšebetso e bileng bohlasoa ea sesole moo ho timetseng banna ba babeli letšolong la sesole la ho batlana le lithunya tse matsohong asele Khokhoba Ha Lebese, Berea ka la 5 Loetse 2024.
E le ho nyatsa ketso ena, ‘muso o lokollotse polelo ka Labohlano la la 13 Loetsoe 2024:
“‘Muso o lemohile ka masoabi hore mosebetsing oa sesole sa Lesotho oa ho hleka lithunya tse seng molaong kahara sechaba, le ho loantša boemo ba lipolao tsa sechaba ke maquloana le lihlotšoana tse itheretseng ho hlorisa sechaba, ho bile le banna ba babeli ba Basotho ba felletsoeng ke bophelo Khokhoba, Ha Lebese, Berea.
Lieutenant General Mojalefa Letsoela, molaoli oa sesole sa Lesotho
“‘Muso o saretsoe ke ketsahalo eo ‘me o tšelisa ba lahlehetsoeng ka tsela ena. ‘Muso o rometse ba litsi tsa tšireletso ho namolela sechaba e seng ho hong.” Polelo ea raliphatlalatso oa ‘muso e baleha joalo.
Polelo e tsoela-pele ho supa ha ‘muso o batlile tlhaloso ho Mookameli oa Sesole ka se etsahetseng ‘me tlhaloso ea sesole e tiisa hore ke ‘nete ho na le banna ba babeli ba ileng ba timella matsohong a sesole kamora ho tšoaroa le ho isoa liahelong tsa sesole.
“Molaoli o re ba ile ba tsoma ‘me ba fumana banna bao bofokisi bo neng bo supa ba na le thepa ea lithunya.
“Ha ba ntse ba etsa mosebetsi, ho bile hoa bonahala ho hlokahala hore ba ba nke ba ee le bona liahelong.
“Ka bomali-mabe, mosebetsing oo oa sesole, banna bana ba timelletse matsohong a sona. Sena ke bomali-mabe hobane litsi tsa tšireletso li lauoe ka thata ho se etse liketso tse tla thunthetsa mosebetsi ona oa ho sireletsa sechaba.
“Molaoli oa sesole o se a laetsoe ho batlisisa litaba tsena ka botebo hore ho tle ho nkoe likhato tse lokelang le ho fumanela mathata a ka suptjoang ke lipatlisiso tseo e le tharollo.
“‘Muso o soabisitsoe ke ketso ena hobane e eketsa masoabi a Basotho ka mafu ao hantle sepheo e leng ho a felisa.” Polelo e qetella ka ho supa hore ‘muso o tla batla maoala a ho thusa litsi tsa tšireletso ho etsa mosebetsi oa ho sireletsa sechaba ka hlokolosi le ka makhethe empa ka matla.
“‘Muso o utloile khalefo ea sechaba tabeng ena ‘me o etse hloko maikutlo a sona hore ha se ananele ho hang, mafu a sechaba mosebetsing ona. Re le utloile sechaba sa ha bo-rona.” E rialo polelo.
