PHAMOTSE O PHEPHETSA TELEKO EA HAE RFP
Ka Moipone Makhemeng
La 11 Pulungoana 2023
Mokhethoa oa lebatooa la Matlakeng ho tsoa mokheng oa Revolution for Prosperity (RFP) Dr. Mahali Phamotse o hlahletse nyeoe lekhotleng le phahameng Maseru bekeng ena. Dr. Phamotse o etsa kopo-thapeli hore lekhotla le phatlalatse qeto e entsoeng ke RFP ho mo leleka mokheng e fosahetse.
Nyeoeng ena baikarabelli ke ba latelang; oa pele ke Seboka sa Khohola-Koqo sa RFP (Annual General Meeting – AGM), Komiti e Kholo ea RFP le mokha oa RFP.
“Molli o ile a fumana lengolo le tsoang ho RFP le bontša le ngotsoe ka la 5 Mphalane 2023. Lengolong ho ne ho thoe molli o lelekuoe mokheng oa RFP. Ke thapeli ea rona hore lekhotla le khabane le nke qeto ea ho leleka molli e le ka thoko ho molao ’me e lahleloe matjoing.” Lipampiri tsa lekhotla li rialo.
Phamotse o boetse o batla hore lekhotla le tšoare RFP matsoho ntlheng ea ho mo leleka.
Molli o re pele a lelekoa, o ile a behelloa ka thoko ho mokha nako ea lilemo tse tšeletseng. O re har’a lipallo tsa pehello ka thoko o ne a thibetsoe ho ikamahanya le tsohle tsa RFP. “Ke ne ke thibetsoe ho etela lebatooeng la ka, ho tšoara likopano lebatoeng leo, ho emela mokha maemong ’ohle, ho apara mebala kapa liphahlo tsa RFP hara tse ling.” O teka sello sa hae joalo.
Dr. Mahali Phamotse sebokeng sa mapomelo sa RFP pele ho likhetho tsa ngoahola
Qeto ea ho leleka Phamotse e ile ea nkoa ke Seboka sa Khohola-Koqo se ileng sa tšoaroa ka la 30 Loetse 2023. Sello sa Phamotse ke hore h’a ka tsebisoa hore seboka se joalo se tla tšohla taba ea teleko ea hae. Lipampiring tsa lekhotla o hlalositse hore ho lelekoeng hoa hae o tinngoe monyetla oa ho itšireletsa kapa ho ipuella pele ho ka fihleloa qeto e boima ea ho mo hlabisa thoto ka monkhoane.
“Ke bolela mona hore ka litsela tsohle, qeto ea ho nteleka, e tlotse molao oa hore lehlakore le leng le mameloe le be le arabele liqoso tse behiloeng khahlanong le lona.
“Ke tlatsa hape hore seboka, e leng moikarabelli oa bobeli nyeoeng ena, o ne a se na matla a ho nteleka ho latela temana ea 13 (d) le (ii) ea molao oa motheo oa RFP. Seboka se sebetsa joaloka lekhotla la boipiletso ho tsoa liqetong tsa Komiti ea Phethahatso.” O li beha joalo.
O tsoela-pele ho tekela lekhotla hore matla a seboka ka molao a hakanyetsoa ho maemo a thathamisitsoeng tlas’a temana ea 17.7 ea molao oa motheo oa RFP. Kahona, o supa tabeng ena, ho ne ho se lintlha tsa molao bakeng sa matla a seboka tlas’a temana eo.
