‘MUELLI OA MASOLE O TLETLEBA HO MOAHLOLI
Ka Moipone Makhemeng
La 18 Loetse 2023
Kajeno lekhotleng le phahameng Maseru nyeoe ea baqosuoa polaong ea molaoli oa mehleng oa sesole, Lieutenant General Maaparankoe Mahao e ile ea lula kapele ho moahloli Tšeliso Mokoko.
Adv. Napo Mafaesa o ile a ema a teka sello sa hae. O itse babuelloa ba hae ha ba thaba ke bosieo ba moahloli ea tšoereng nyeoe ena Mohlomphehi Charles Hungwe kajeno lekhotleng.
Mafaesa o ile a tletleba hore joale ba bona nyeoe e sisintha kaha e se e le selemo sa botšelela baqosuoa ba hoehla chankaneng ho se pheletso holima nyeoe e ba tobileng feela ba hanetsoe tokollo ka beile.
Sena Mafaesa o se buile kapele ho moahloli Tšeliso Mokoko ea neng a tlile ho tla chechisa nyeoe ka lebaka la bosieo ba moahloli Hungwe tlas’a mabaka a sa hlalosoang. Adv. Mafaesa o boetse a batla ho tseba hore na mofapa-hlooho o se o le malala-a-laotsoe ho tsoela-pele ka nyeoe kaha a re o utloile ba bua ka ho se be maemong a ho bua nyeoe.
Adv. Rethabile Setlojoane e leng eena ea seng a tlo chochisa nyeoe ena kamora boitokollo ba Adv. Shawn Abrahams le Motene Rafoneke, o hlaloselitse Lekhotla hore ba ile ba etsa kopo ka mongolo ho mongolisi oa lekhotla mabapi le ho fumantšoa lirekote tsa nyeoe tse fetileng nyeoeng ena hammoho le mapaki e le hore a tsebe ho itlhopha.
Setlojoane o hlalositse hore lengolo le ngotsoe ka la 4 Phato 2023 empa o fumane karabo ka la 29 Phato 2023 ho tsoa ofising ea mongolisi oa lekhotla.
Mona o ne a etsa kopo ea hore ofisi ea Mochochisi e Moholo e fane ka mochini o bolokileng lirekote tsa nyeoe.
Tlhalosong ea hae, Setlojoane o supa hore Mochochisi e Moholo o fane ka tsona ka la 5 Loetse 2023 ‘me esale ba emetse Mongolisi hore a fetisetse lirekote molemong oa hore a tsebe ho li fumana. O re leha ho bile le lipuisano tse ‘maloa ha ba e-s’o fumane lirekote tsa mapaki empa ba tla tsoela-pele ho sala taba ena morao.
Adv. Qhalehang Letsika, o kopile lekhotla ho lumella Captain Litekanyo Nyakane ho ea bona ngaka
Ho sa le joalo, Adv. Qhalehang Letsika o ile a etsa kopo ea hore lekhotla le laele hore ‘muelloa oa hae, Litekanyo Nyakane a isoe ngakeng kaha bophelo ba hae bo se botle a hloka ho bona ngaka. Moahloli Mokoko o fane ka taelo ho mok’homishinara oa Lichankna ho isa Nyakane sepetleleng sa Makoanyane. Ho feta mona, Mokoko o ile a bontša hore nyeoe e tla lula ka la 26 Loetse 2023 ‘me e tla mameloa ke Moahloli Hungwe.
Baqosuoa nyeoeng ena ke Lit. General Tlali Kamoli, Captain Litekanyo Nyakane, Captain Haleeo Makara, Sergeant Lekhooa Moepi, Sergeant Motsamai Fako, Corporal Marasi Moleli, Corporal Motšoane Machai, Corporal Mohlalefi Seitlheko le Corporal Tšitso Ramoholi.
