BA QOSOA KA POLAO E SEHLOHO EA NYAMANE
Ka Moipone Makhemeng
La 31 Phupu 2023
Banna ba bahlano ba Ha Seoli motseng oa Ha Makhupane ha morena Khoabane Theko, Leronti Matlosa (45), Lesole Mothebeli (34), Motlalepula Mopeli (34), Thapelo Khomo-e-Ntšo (31), Molefi Kheoane (23) le e mong oa Qoaling, eena e le Thabiso Nkeoane (24), ba hlahile lekhotleng la ‘Maseterata Maseru kajeno kapele ho ‘Maseterata Lebusa Tšosane ba qosoa ka qoso tse peli e leng ho baka lefu la Mpho Nyamane esita le ho senya thepa ea hae.
Mochochisi ha a ba balla qoso o itse ka la 23 Phupu 2023 ba le Ha Makhupane, Ha Seoli, Maseru ba le kaofela le ka morero o tšoanang, ebile e le ka maikemisetso le ka thoko ho molao ba ile ba khakhatha ka sehloho e mong Mpho Nyamane ka melamu. Ba boetse ba mo nyekenya ka lithipa le lerumo ‘me ka ketso ena ba baka lefu la hae.
Qosong ea bobeli, ho hlalosoa ba ile ba senya thepa ea hae ka ho pshatla lifensetere tsa ntlo. Ba boetse ba roba lemati ekasitana le ho pshatla thepa ea hae ea ka tlung. Mochochisi nyeoeng ena ke mofumahali Sekoati.
