‘MATEKANE O SEBELISA TEMANA EA BOHLANYA’ – MACHESETSA
… O LAELA HORE LIFONO TSA MOFOMOBE LI TŠOAROE
Ka Moipone Makhemeng
La 18 Mots’eanong 2023
Moetapele oa mokha oa Manashenale, Basotho National Party (BNP) ebile e le moparamente, mohlomphehi Machesetsa Mofomobe maobane o ile a eteloa ke mautloela ‘moho le mapolesa a tso’ere lengolo tsoang ofising ea Tona-Kholo, Ntsokoane Matekane ‘me le laela hore a nehelane ka mehala ea hae ea thekeng malebana le lipatlisiso tse ntseng le tsoela-pele tse sa hlalosoang lengolong.
Sena se tla kamora hore ho potolohe ho marang-rang likhatiso tsa puisano ea hae le eo e seng e le mofu Ralikoenelo Joki oa Tšenolo FM. Puisanong le Leihlo la Basotho, monghali Mofomobe o itse ha a tsebe hore na o fuputsoa malebana le eng kaha lengolo le sa hlahisa se batloang.
Lengolo la tona-kholo le laelang hore lifono tsa Mofomobe li ts’oaroe
“Ke tsebella kae hore ke fuputsoa ka eng hoba lengolo ha le ea hlakisa hore ke fuputsoa ka lefu la Leqhashasha.” Mofomobe o rialo ha a botsoa hore na o belaelloa polaong ea Joki kapa che.
Leha ho le joalo, Mohlomphehi Mofomobe o re o hanne ho nehelana ka mehala ea hae ka le reng seo se ka thoko ho molao oa motheo o reng motho e mong le e mong o na le lekunutu (right to privacy).
Lehoja lengolo le laelang ho nkoa hoa lifono tsa hae le ne le itšetlehile ka temana ea bohlano ea Molao oa Tšireletso ea naha, mohlomphehi Machesetsa o hlalosa tjena; “Ntho eno e ntseng ba e qotsa mono e ka thoko ho molao, ba qotsitse temana e bitsoang ea bohlanya.”
Ho tsoela-pele, Mofomobe o hlakisitse hore puso e arotsoe ka mekhahlelo hore mokhahlelo ka mong e etse mosebetsi oa oona.
“Paramente e etsa molao, makhotla a toloke molao, ebe ‘muso oona o aba lichelete hore makhotla le paramente li sebetse.
“Lebaka le entseng hore makhotla a arohane le puso ke hore ho se be le ralipolotiki ea ka etsang mosebetsi o etsoang ke makhotla.
“Nahana ha re ka fa bo-ralipolotiki matla a ho etsa li-warrant le li-court order, ho ka ba joang? Ke ka hona makhotla a fuoeng matla a joalo, pele le etsa qeto, lekhotla le imamela pele hore na ho nepahetse ho tšoara lifono tsa motho ‘me ebe le etsa taelo e joalo ha le khotsofetse hore ho nepahetse.
“Hoja ba kene ba tšoere taelo ea makhotla ‘ne ke tla ba fa lifono tsena, e seng ralipolotiki eo ke qothisanang lehlokoa le eena ebe o etsa warrant ea hore ho tšoaroe lifono tsa ka.” O li beha joalo.
Ha a phethela litaba tsa hae Mofomobe o bontša hore mautloela ha ana tokelo ea ho etsa lipatlisiso tsa botlokotsebe ka tsela efe kapa efe. O bontša hore lipatlisiso tse joalo li etsoa ke mapolesa feela. Ha a fera puisano o re: “Mapolesa ha a ka mpitsa nka ea ke matha hobane ‘ona a na le matla a ho etsa joalo.”
