KABELI O QOSOA KA BOSHOLU BA LIKHOMO TSA SEKONYELA
Ka Moipone Makhemeng
La 24 ‘Mesa 2023
Teboho Kabeli (39) oa Ha Maqhoba Ha Katu, Maseru Ha Morena oa sehlooho Seeiso Bereng Seeiso o hlahile kajeno Lekhotleng la ‘Maseterata Maseru kapela ‘Maseterata Kolisang le mochochisi Ratšita ka qoso ea tlolo ea molao ea bosholu ba liphoofolo.
Ho ea ka lengolo la qoso, Kabeli o ile a ikhapela likhomo tsa tsa e mong Sekonyela Sekonyela ka thoko ho molao le ka maikemisetso ka thuso ea ba bang likhomo tse peli e leng e sootho bo tebileng le e khunong ka la 6 ‘Mesa 2023 a le Ha Maqhoba seterekeng sa Maseru.
Moqosuoa o tla boela a hlaha kapele ho lekhotla hosane ka hora ea bobeli ho tla ikopela beile kaha kajeno a sa ba le monyetla oa ho e kopa. Ho utloahala ha sena se sitisitsoe ke setatemente sa sepolesa seo ho utloahalang se saletse morao. Kahona moqosuoa o tla robala chankaneng bosiung bona ha a ntse a emetse ho lo ikopa beile hosane.
