TŠOMO EA MONYOHE
Ba re e ne e re; e le Monyohe, joale e le noha; eaba ‘m’ae o mo nyalla mosali ea bitsoang Senkepeng. Joale Monyohe ho ne ho sa besoe ka tlung ea hae, hobane o ne a lula sehlohlolong sa ntlo
Eaba kamehla ‘m’ae o ntsa mo isetsa lijo hona moo sehlohlolong. Ka tsatsi le leng ‘m’ae a lata Senkepeng mosali oa Monyohe, a mo tlisa mona ha hae.
Monyohe o ile a aheloa ntlo ka thoko. Joale ‘m’ae a re ho mosali oa hae: Ngoana mokhotsi, nka lijo tsena, u li ise ntlong eane; u fihle u li behe.
Senkepeng o ile a li nka, a li isa ntlong eane; eaba o’a khutla. Eitse ha a le tseleng, eaba o re: Ebe monna oa ka ke tla ‘mona neng? Eaba oa tsamaea, o fihla a lula hae.
Eaba ‘m’ae o ea ho Monyohe, a fihla a nka lipitsana tse tšetseng lijo; eaba o khutla le tsona; a ‘na a etsa joalo kamehla.
Ka letsatsi le leng ‘Mamonyohe a re ho Senkepeng: “Ngoan’aka, tsamaea u ee ntlong eane u il’o robala teng.” Eaba ngoetsi e leba teng; A re ho ngoetsi: “U nke mollo, u se ke be oa besa mosi, u bonese ka tšotso feela.”
Joale ngoetsi e etsa joalo ka matsatsi, hoa ba hoa feta khoeli. Eitse ka tsatsi le leng a re: “Moo ho thoe ke se ke ka besa mosi, ‘me le lijo li ntlong eo!
Joale a nka lisu, eaba oa besa. Eitse ha mosi o e-ba mongata, Monyohe a theoha holimo sehlohlolong, a mo otla ka mohatla, a mo otla.
Eitse e le khale a tsoa ka tlung, a baleha, a baleha, a ntsa mo otla Monyohe. A tsamaea a ntsa re:
Senkepeng oa Kaliana ke nyetsoe ke Monyohe!
A tsamaea a ntsa rialo, a ba fihla ho balisana. Eitse ha Monyohe a fihla, balisana ba re: “Bonang, bonang, ba bolella balisana ba bang, nthoe eo e tlang le moo ke eng?”
Ba re: “Leotsang lithipa.” A fihla a feta Monyohe. Joale mosali o sa atametse hae. A fihla ho eena, a mo otla. Babo ba re: Bonang lerole! Athe ha ba tsebe hobane ke ngoana bona. Eaba oa mo tlohela Monyohe. A fihla hae a re:
Senkepeng sa Kaliana ke nyetsoe ke Monyohe!
Eitse ha a e-tla, a re: “Bonang lerole le hlahang lane, ke lona.” A fihla. Eitse a sa tla, a sa le hole, ba tsoela kantle, ba mo thiba. A fihla a ema kantle; eaba o kena serobeng sa lintja. ‘Mamonyohe hae koana o ne a ntse a lla, a re: “Ngoan’aka batho ba ‘molaea!” Joale a ea habo mosali oa Monyohe.
Ha a fihla a ba botsa, a re: “Senkepeng o kae?” Ba re: O teng. Eaba o re: Mpitsetseng eena.
Senkepeng a tla; a re ho eena: “U entseng, ngoana mokhotsi? Ke u laile hakaale ke re u se ke oa besa mosi?”
Eaba Senkepeng o re: “Ke ne ke hatsetse.” Eaba ‘m’ae o re: “Ngoan’aka o kae?” Eaba o re: “Ke eno ka serobeng. Eaba oa ea, a re: “Ntlhabeleng khomo e ntšo. Eaba ba e hlaba, ba e buoa. Eaba o nka letlalo la eona, a roalla patsi e ngata, a fihla a besa mollo ka serobeng a fa Monyohe joala.
Monyohe a noa, a tahoa. Eaba o besa mollo o moholo. Monyohe a cha, a ba a shoa, ea e-ba molora.
Eitse ha e se e le molora, eaba ‘m’ae o ntšetsa molora kantle; eaba o khetha molora ona oa Monyohe, a o phuthela letlalong la khomo. Eaba o o beha ka tlung, a o ribeha ka pitsa e kholo. Eaba oa lula.
Ka tsatsi le leng a koaholla, a fumana letlalo le ntse le kunya-kunya. Eaba o nka bolokoe, oa betiela; eaba oa tloha, a ea hae. A re ho Senkepeng: “U lebele pitsa eo ea ka, u se ke be ua ua e koaholla, hofihlela e ikoaholla.”
Eitse ka tsatsi le leng ea ikoaholla. Senkepeng a ea ho ‘Mamonyohe, a re: “Pitsa ea hau e ikoahollotse.” ‘Mamonyohe a phakisa a tla, a nkile mafura, letsoku, sekama le sebilo. A fihla a tlotsa pitsa, a fumana motho a le teng ka pitseng, e le lekoloane. Joale a re: Ngoan’a ka, mosali enoa oa hao u mo rate, hobane ke eena ea u entseng tjena.
Eaba o bitsa Senkepeng, a tla; eaba o re ho eena; “Monna oa hau ke enoa. Senkepeng a thaba haholo. Eaba ba ea ha habo. Eitse ha ba fihla ha habo, Senkepeng a tsoala ngoana.
Eaba Monyohe o re: “Ngoana enoa oa ka a se ke a ba a khoaisoa.” Eaba ‘Mamonyohe o re a khoaisoe. Monyohe a ea meraka. Eaba ba sala ba khoaisa ngoana oa hae. Eitse mohla likhomo li koebang, Monyohe a tla, a fumana ba mo khoaisitse. A re ho Senkepeng: “Ntša ngoan’aka.”
Senkepeng a re: “Ha ke re ‘m’ao o mo khoaisitse.” Eaba Monyohe o ea ho ‘m’ae, a re: “Ngoaneo oa ka ke mang ea itseng a khoaisoe?” ‘Mamonyohe a re: “Ke ‘na.” Eaba Monyohe o otla mosali oa hae; eaba mosali oa hae o oa ngala.
Eitse ha a fihla ha habo, Monyohe a ea. Eaba babo ba re: “Senkepeng, khutla u ee hae ha hau, ha monna oa hau.” Eaba ba re ho bahlankana ba motse oo: “Mo felehetseng ‘me ba mo felehetsa. Eare ha ba fihla naheng, ba bolaea Monyohe a shoa. ‘M’ae le eena a tla, ho batla ngoana hae empa le eena ba ‘molaea.
Ke tšomo ka mathetho.
- Litšomo tsa Basotho
