BAHLANKANA BA BANE
Ba re e ne le bahlankana ba bane ba phela haufi le mosali ea neng a lula leralleng le ka nqena. Athe bahlankana ba bane bona ba ne ba lula lerallaneng le leng. Joale bahlankana ba ne ba phela ka ho tsoma liphoofolo empa mosali enoa a tsietsoe ho se seo a se jang kaha a ne a sa tsebe ho tsoma liphoofolo.
Ke moo bahlankana ba ileng ba bolaea liphoofolo, empa ba li jella naha thote. Joale e mong a re: Na mosali eloa ha a tsamaea joalo ka rona tjee, ebe liphoofolo o li tsomeloa ke mang? Joale e mong a re: Ha a tsamaee joalo ka rona, ha a tšoaneloa ho tsoma liphoofolo. E mong a re: O na le maoto le matsoho, ha a tšoaneloa ho bolaea liphoofolo ke’ng?
Eaba e mong o re: Ke sa ea ho eena, ke lo bona hore na ke motho ea joang ha a sa tsome liphoofolo joaloka rona. O ile a mo fumana a lutse. Eaba o re ho eena: U jang, uena? Eaba mosali o re: Ha ke je letho, ke noa metsi feela. Ke ho fela? E. Joale hee a tloha, a tsamaea a khutlela ho bo-mphato; eaba o re: Motho eo ha a sebopehong sa rona, o sebopehong sesele. Joale ha a fihla ho bahlankana ba bang, a re: Ke motho ea sa tšoanelang ho bolaea liphoofolo eno. Ba re: O joang? Eka o na le maoto le matsoho le hlooho, empa o sebopehong sesele. Joale le mollo ha a o bese? O lula feela?
O ja eng motho eo? O noa metsi; ha ho ntho e ‘ngoe eo a e jang. Joale hee le mollo? Oa o hloka, o lula feela. Joale hee bahlankana ba bang ba makala; ba robala, ba robala. Hosane ba ea tsoma liphoofolo ‘me ba tla ba li bolaile. Eaba mohlankana o re: Banna, ke sa mo sehela, nke ke bone na o tla ja nama.
Joale ba lumela. Eaba o seha nama, o nka mollo, o roalla lisu tsa liphoofolo; a fihla a besa, a ‘mesetsa le mollo; a boea a besa nama ena. Ha e butsoa, a mo neha eona, a re: Nka u je. A nka a ja. A bona a e-ja, empa joale a makala. A e-ja; eaba o ntsa beka e `ngoe, a re : Nka u tle u sale u ipesetsa. Eaba o khutlela ho bahabo, o re: Banna, o jele; o ntsa e ja joalo ka rona; empa o tsietsoe, ha se mofuta o ka bolaeang liphoofolo. Eaba o boea a tsoma. Mosali enoa o hlobotse; le bona bahlankana bana ba hlobotse, ba apara matlalo a liphoofolo ha a le metsi feela. Hloohong ba roala metsu ea bona. Mohlankana a ea, a mo isetsa nama. Ba re: u ntso `molaela liphoofolo, re tla u tima joale! A khutsa. Mosali enoa a nyoroa joale ha a ja nama ea liphoofolo.
A rafa letsopa, a bopa pitsana ka lona; a le beha letsatsing, la omella, a ea kha metsi. Ha a fihla a beha metsi ka letsopa, eaba letsopa le ea oa. Joale a boetse a bopa. Hosane a e beha, ea oma: A bopa tse peli. A roalla lisu, a li besa; a bona li tsoa; a ea kha metsi, a bona metsi ana a ntsa lutse.
Joale e `ngoe a hatleha ka eona nama; eaba o besa mollo. Nama ea butsoa, eaba oa e ts`ola, a e ts`olela letlapeng; o nokela e `ngoe pitseng. Joale oa ja. Le e `ngoe joale a e beha ka pitsa. Monna enoa a tla, a fihla a mo neha nama e`ngoe; a re ho monna eo: A ko je mono, u utloe. Joale a ja a phoka moro, joale a makala. A boela ho bahabo, a re: Banna o bopile mobu; o mong o kha metsi ka oona, o mong o pheha ka oona. Utloang nama eo a e phehang. Ha se mofuta oa rona. Ba makala. Ha, ea e mong, a mo talima; a ja, a phoka moro; a makala ke pitsa ena. Joale a ea ho ba habo, a re: Ke mofuta o mong; ha se oa rona. Joale ea ba monna enoa o sala ho mosali enoa, o se a mo apehela liphoofolo. Eaba bahlankana ba bararo ba ea qhalana, ba siea monna enoa le mosali enoa ba le babeli.
Ke tšomo ka mathetho.
