TSA POLAO EA MATABANE POOANENG
Leihlo la Basotho – La 2 Tlhakubele 2023
Botsamaisi ba ‘moshara oa Naledi Funeral Planners bo ile ba sibolla hore Mookameli-Kakaretso oa ‘moshara oo, Thabiso Maliba o ameha bosholung ba bomene-mene ba chelete e kaalo ka M10 milone.
Bookameli bo ile babehella Maliba ka thoko ho mosebetsi e le ho mo fuputsa 12 Pulungoana 2022. Kamora moo lipatlisiso tsa ‘moshara ho fumana ka botebo maphemphe a Maliba li ile tsa thakholoa eaba Matabane o fuoa mosebetsi oa ho phenya Maliba mahafi.
Ho ea ka tlaleho ea koranta ea the post https://www.thepost.co.ls/ sepolesa se belaela hore Maliba o rekile babolai ka M50 000 ho fenetha Matabane le ‘Makong (Ts’oana Molefe), ba ileng ba thunngoa le ho bolaoa mots’eare ka la 10 Hlakola 2023, ba le ntlong ea thekiso ea lijo – The Deck, Maseru.
Pelaelo e tsoela-pele ho supa hore Maliba o ile a fa monna oa Maputsoe, Molisana Sekoala kapa Chakela ka moo a tummeng ka teng chelete e boletsoeng hore a mo thuse ho hleka Matabane tseleng. Eka Sekoala o ile a kopana le motsoalle oa hae oa Nazareta, Bokang Mabusela ‘me Mabusela a kopanya Sekoala le monna e mong ea ileng a lumela hore ba tsoele-pele ka morero oa ho fenetha Matabane.
Leha ho le joalo, monna eo o ile a nyamella bao matsatsi pele a lokela ho fenetha Matabane. Monna eo o ile a hlaha hape a bolella bo-Sekoala hore o buile le monna e mong oa likobo ea itseng o tla ba thusa ho etsa mosebetsi oa polao. Sekoala le Mabusela ba ile ba kopana le monna eo oa likobo matsatsi a mahlano pele Matabane a bolaoa. Monna eo o ile a kopa ho sebetsa le monna e mong hape ho tlosa Matabane tseleng.
Tumellano ea bona e bile hore Sekoala le Mabusela ba tla lisa metsamao ea Matabane ‘me ba e tlalehele babolai.
Ho hlahella hore ka la 7 Hlakola 2023 matsatsi a mararo pele ho polao, Sekoala le Mabusela ba teng khatisong ea CCTV khoebong ea thekiso ea joala ea Matabane Ha Thamae moo ba fihlileng ba botsa hore Matabane o hokae. Ba boetse hape ka la 8 Hlakola 2023 ba ile ba bonoa the Deck, e leng khoebong e ‘ngoe ea Matabane.
Hape-hape ka la 9 Hlakola 2023 letsatsi pele Matabane a fenethoa CCTV e ba hlahisa ba le The Deck ba ntse ba etsa ts’ebetso ea bohloela. Ka la 10 Hlakola 2023 ba ne ba le teng hape The Deck ‘me mohla tsatsi leo Matabane o ne a tlo ba le kopano le mosebetsi-moho, ‘Makong hona mono. Bo-Sekoala ba ile ba reka lijo ‘me hang ba fetoha ba re ba kopa hore ba li ts’elloe lifoma-phekeng eaba ka potlako ha ba qeta ho li fuoa ba tsoa ba potlakile.
Metsotso e fokolang bo-Sekoala ba tsoile, ho ile hoa kena banna ba babeli ba fihla ba thunya Matabane le Makong ha ba qeta ba tsoa ba kena koloing ea tekesi e neng e eme ka ntle. Mapolesa ha a etsa lipatlisiso a lekile ho sala morao koloi e neng e hlaha ho CCTV e neng e sebelisoa ke Sekoala (e shebe fotong) eaba oa ts’oaroa Sekoala ‘me ho bonahala o nyele matsete.
Sepolesa se ile sa bitsa Maliba ho itlaleha sepoleseng ‘me ka la 27 Hlakola 2023 o ile a fihla sepoleseng a ts’oaroa a nt’o hlahisoa khotla maobane – la 1 Tlahubele 2023. Sekoala o ile a lokolloa ke sepolesa ‘me kutloisiso ke hore o fetohile paki-mots’oaeli.
Maliba o tla hlaha Khotla hape ka la 15 Tlhakubele 2023.
Litaba tse amanang le tsena li hlahella linking tse ka tlaase:
