THABISO MALIBA KHOTLA KA POLAO EA MATABANE LE TŠOANA
Leihlo la Basotho News – La 1 Tlhakubele 2023
Ka la 10 Hlakola 2023 mots’eare oa lenyeta, e bile semaka ha banna ba babeli ba itšohlometsa ntlong ea thekiso ea lijo ea The Deck, Maseru ba fihla ba thunya le ho bolaea Mookameli e Moholo oa Lichelete (Chief Finance Officer) oa ‘moshara oa Naledi Funeral Planners mofu ntate Ikhetheleng Matabane ea neng a le sebakeng seo a ntse a sebetsa le ’m’e Tšoana Molefe (‘Maserema ‘Makong) ea neng a sebetsa ‘moshareng oo e le Mookameli oa Lichelete (Finance Manager) ‘me le eena o ile a fenethoa ka sethunya.
Kajeno lekhotleng la ’maseterata oa Maseru, Mookameli oa ’moshara oa Naledi Funeral Planners, Thabiso Maliba (49) oa motseng oa Matlatsoaneng, Khanyane, Hlotse, Leribe o hlahile ha khutšoane khotla a qosoa ka ho ba le ’mommori le ho phethahatsa polao ea monna le mosali sebakeng se boletsoeng kaholimo.
Babelaelloa ha ba kena the Deck (CCTV image )
Mochochisi o balletse moqosuoa qoso ka tsela ena: “O qosoa ka liqoso tse peli; ea pele o tlotse litemana tsa 40 (1) tsa pokello ea litlolo tsa molao ea nomoro ea botšelela ea selemo sa 2010 ka hore ka la 10 Hlakola 2023 u le kae-kae sebakeng se bitsoang the Deck, Maseru kapa haufi le teng, uena ka thoko ho molao le ka maikemisetso le ka ’mommori le ba bang le thuntse le ho bolaea Ikhetheleng Matabane.
“Qoso ea bobeli ke e tšoanang ka hore ka ’mommori o tšoanang le ka maikemisetso le ba bang le thuntse le ho bolaea Tšoana Molefe le le sebakeng se tšoanang ka la 10 Hlakola 2023.” O baletsoe qoso joalo.
Babelelloa ba baleha kamora ho thunya bafu (CCTV image)
’Maseterata Peter Murenzi o ile a balla moqosuoa litokelo tsa hae tse kenyeletsang ho ipatlela ’muelli oa khetho ea hae ea tla mo thusa ho kopa beile Lekhotleng le Phahameng. Ho sa le joalo, babelaelloa ba hlahang litšoantšong tsa CCTV tse maneuoeng kahara litaba tsena esale ba ina libono metsing; ha ba e-s’o tšoaroe.
Moqosuoa o laetsoe ho khutlela toronkong ’me a tle lekhotleng hape ka la 15 Tlhakubele 2023.
