SSP SEHLOHO O KHOAOLLA MOFAO OA RWANDA
Ka Moipone Makhemeng
La 7 Phupu 2023
Mookameli oa sepolesa sa Lesotho (Lesotho Mounted Police Service – LMPS), Monghali Holomo Molibeli, o re ke taba-tabelo ea hae ho chorisa litsebo tsa mapolesa a Lesotho. Ho fihlela sena, a bua mohla ho chesoang mophato oa mapolesa a macha, Molibeli o re LMPS e thehile setsoalle le sepolesa sa Rwanda. O bile a supa hore ba rometse Senior Superintendent (SSP) Ntohla Sehloho kolecheng ea sepolesa sa Rwanda (National Police College – NPC) ho ithutela lengolo la Senior Command and Staff Course (PSCSC).
Ka la 30 Phuptjane 2023, SSP Sehloho o bile hara mapolesa a 35 ho tsoa linaheng tse leshome, a ileng a chesa mophato kamora ho phethela koetliso ea lengolo la Police Senior Command and Staff Course (PSCSC). Mapolesa a 35 a neng a le boithutong ke a linaha tsena: Ethiopia, Kenya, Malawi, Namibia, Lesotho, Nigeria, Somalia, South Sudan, Tanzania le Rwanda.
SSP Sehloho o khutletse mosebetsing ‘me moqolotsi oa Leihlo la Basotho o ile a mo etela ho utloa hore o khoaelletse Basotho eng.
NALANE EA SSP
O hlahetse Lithoteng, Ha Lekhoaba (Ha Pita), Maseru ka la 18 Tlhakubele 1983. O qalile ho kena sekolo sa mathomo Seleso Primary School, a etsa lengolo la Junior Certificate Qoaling Community Secondary School ‘me a phethela lithuto tse mahareng St. Saviours High School Leribe.
SSP Sehloho o na le mangolo a latelang a thuto e phahameng: Bachelor of Arts in Law – BA Law – (National University of Lesotho, Master of Laws (University of South Africa), Master of Peace Studies and Conflict Transformation (University of Rwanda), Post Graduate Diploma in Strategic Leadership & Management (African Leadership University), Certificate in Peace Support Operations (Centre of Excellence for Stability Police Units, Garabinieri, Italy) International Computer Driving License Profile Certificate (ICDL Africa) le Police Senior Command and Staff Course (PSCSC).
![](https://leihlolabasotho.co.ls/wp-content/uploads/2023/07/SSP-Tohlang-Sehloho-kamora-ho-amohela-lengolo-Rwanda.png)
Senior Superintendent Sehloho ha a qeta ho abeloa lengolo la PSCSC Rwanda ka la 30 Phuptjane 2023
Kamora ho phethela lengolo la BA Law o ile a kena sepoleseng ka Phato 2010 ‘me a phethela koetliso ea sepolesa ka la 1 Phupu 2011. Hang ha a qeta koetliso o ile a sebetsa lefapheng la thibelo ea bosholu ba liphofolo Thaba-Tseka, teng a nka lilemo tse peli, e leng ho tloha ka 2011 ho isa 2013.
O hlalosa hore ha a tloha Thaba-Tseka o ile a isoa Mohale’s Hoek a sebetsa e le ramolao oa sepolesa literekeng tse ka boroa (South Region), ho tloha ka 2013 ho isa 2015. Mona o bolela hore o ile a tšoarela mapolesa lithupelo tse neng li hlabolla mapolesa. Ho feta mona, o ile a isoa Sekolong sa Koetliso ea Sepolesa (Police Training College – PTC) a sebetsa e le mokoetlisi e moholo oa baithuti ba sepolesa. O boetse o re nakong eo o ne a a ithutela lengolo la Masters in Law le University of South Africa, leo a ileng a le phethela ka katleho ka 2018.
O boetse a sebetsa e le e mong oa baeletsi ba molao ba Mookameli oa Sepolesa. O bontšitse hape a ile a romeloa ke sepolesa ho sebetsa ofising ea Ramolao e Moholo oa ‘Muso (Attorney General) lilemo tse ‘ne tseo a li qetileng a sebetsana le makhotla. O supa hore sena se etsahetse hofihlela ngoahola ka la 16 Tlhakubele 2022 ha LMPS e mo romela koetlisong Rwanda.
PUISANO E TSAMAILE JOANA:
Leihlo la Basotho (LB): Re lemoha hore esale u le motho oa molao ho tloha sethathong. Ebe u susumelitsoe ho tla sepoleseng ke eng kamora ho phethela lithuto tsa hau tsa molao NUL?
SSP Sehloho: Khaitseli ea ka, lintho tsena ke tsa ka li le peli. Ke ne ke rata sepolesa ebile motsoali oa ka ke lepolesa. Legal Practice esale ke le passionate ka eona. Hantle Law ke na le personal history ka eona ke le motho. Bothateng bo bong boo ke ileng ka thulana le bona nkile ka thusoa ke motho ea entseng molao ‘me ka utloa eka ke lefapha leo ke le ratang hore le ‘na ke tlo thusa batho ba bang ba se nang matla.
LB: Joale ke uena enoa u se u fihlile Rwanda ka bona, ebe ke liqholotso lifeng tseo u ileng oa thulana le tsona ‘me ke ka tsela efeng o ileng oa li fenya?
SSP Sehloho: Oa tseba ho ne ho se liqholotso ntle le hore feela motho u tla be u le motho oa lelapa joale o siile bana hae ba lla. Ho feta mona, seo motho u se fumaneng e le qholotso ke ho bona bophelo ka tsela e batlang e fapane e seng feela karolong ea tšebetso ea sepolesa empa human security le food security, hore na batho ba phela joang hore ba je letsatsi le letsatsi hoba lela le lapileng ha le na tsebe.
Litlolo tsa molao li ba teng ha batho ba lapile. Empa ha batho ba khona ho fihlela litlhoko tsa bona u tla bona hore ba ea laoleha. Ke ne ke bona batho ba moo ba laoleha, lintho ba li etsa ka tsela e batlang e fapane.
LB: Ebe ho feta moo ke eng eo u tlileng u ithutile eona ka ho fetisisa malebana le mosebetsi oa sepolesa le ho Basotho ka kakaretso?
SSP Sehloho: Taba e kholo ho lepolesa ke issue of crime. Ntho eo ke tlileng ke ithutile haholo ke maoa a batlang a fapane a sepolesa sa ka nqane ao se a sebelisang. Re bile le internal study tours le external study tours.
External study tours li bile Botswana joalokaha e le eona number one ka hara Afrika ha Rwanda e e latela. Re bone maoa ao ba a sebelisang hore batho ba mono ba se nke tlolo ea molao hanyane, ‘me taba ea mapolesa e laolehile haholo.
E ‘ngoe eo re e boneng ke taba ea community policing joaloka bo-mahokela. Re bone ha batho ba mono ba e matlafatsa re ba le other force multipliers, bacha le security hore na ba sebetsa joang. ‘Me ho li fetisa ke ho lula fatše le beng ba ka ho ba khoaollela seo ke tlang ke se tšoere ebe joale re tseba ho nanabetsa ho mapolesa a heso kaofela.
LB: Ebe ha u sheba sepolesa sa Rwanda le sa Lesotho u bone phapano e le hokae?
SSP Sehloho: Oa tseba ho ne ho se na phapano. Ho teng ke hore ba na le a lot of capabilities. Ba boetse ba na le lisebelisoa tsa sejoale-joale tse akhang electronic policing e leng hore so far rona ha re e-s’o li sebelisi ka bongata-ngata joaloka CCTV cameras kapa Surveillance Cameras.
LB: Re etse hloko mangolo a thuto a mangata ao u a tšoereng. Na e se e le ha u qetile ka thuto kapa ho na le moo o habileng teng?
SSP Sehloho: Hojoalo, ho na le moo ke habileng teng. Ke lakatsa ho bona ha selemo sena se fela ke be ke le kahara lengolo la bongaka (PhD).
LB: Pono ea hau ka sepolesa sa Lesotho kamoso ke efeng? Bonyane ka lilemo tse tharo tse tlang ho tloha hajoale?
SSP Sehloho: Ke lakatsa ho bona ho ba le tšireletso hafeela maano a kene tšebetsong. Hape ke lakatsa ho bona ho se na litlolo tsa molao; batho ba phela ka khotso. Taba ena e kenyeletsa le ‘muso, le oona o lokela ho thusetsa ka lisebelisoa.
Mohlala, ha motho a qeta ho etsa tlolo ea molao ebe o kenngoa ka hare ho data base ea marang-rang hore ha a feta ka mona camera e khone ho lemosa ba kahara command room hore motho ea ntseng a batloa ke eo a feta.
LB: Ha re phethela, keletso ea hau ke efeng ho bacha ba ntseng ba kena kahare ho sepolesa le batlang ho kena kamoso?
SSP Sehloho: Taba ea bohlokoa ke hore motho a tsebe ntho eo a e batlang. Ha re se keng ra tla sepoleseng feela hore re tlo fumana chelete. Ebe Mosotho ha a tla a utloisitsoe bohloko ebe re ‘matla tjotjo. Ha re nkeng nthoena e le mosebetsi oa bopostola, re se ke ra e nka e le khauta kapa silivera. Just do it, u tla bona ntho tse ntle li tla u etsahalla. Le ‘na li etsahala ke le thoko le bopolesa ke le makhotleng koana.