SEPETLELE SE TSOA PUO KA NGAKA E QOSOANG KA PETO
La 7 Tšitoe 2023
Ka moqolotsi oa rona
Bookameli ba sepetlele se ikemetseng sa Centre for Equal Health Access Lesotho (CEHAL), se Ha Ntjabane, Berea bo lokollotse polelo mabapi le liqoso tse tobileng e ‘ngoe ea lingaka tsa sona – Dr. Daniel Deogratias Kiyanga ea ileng a hlaha lekhotleng la ‘maseterata oa Berea ka la 30 Pulungoana 2023 a qosoa ka peto ea moroetsana ea lilemo li 15.
Ho ea ka tlaleho ea sepolesa, Dr. Daniel Deogratias Kiyanga (59) ke letsoalloa la Tanzania ‘me lekhotla le mo file beile ea M1, 000 le tiisetso ea M25, 000 tseo a hlolehileng ho li lefa ‘me o emetse nyeoe a le chankaneng.
Sepolesa se re ngaka e hlekefelitse ngoanana ka makhetlo. Eka o ne a nka bana a ba isa hahae hore ba mo thuse ka ho mo hloekisetsa kaha a lula a le mong a se na lelapa; ’me ke hona moo a shebang nyamatsane ea hae. Tlaleho e re o ile a kopana le lehlatsipa le bana ba bang a ntse a tsamaea ka koloi, eare h’a qeta ho siea bao ba bang kaha ba ne ba theoha pele ho lehlatsipa o ile a ea ka lona a lo le hlekefeletsa ka koloing sebakeng se ipatileng.
Ka letsatsi le leng a le bitsetsa ha hae hore le ilo hloekisa eaba oa le hlekefetsa. Lehlatsipa ha le ka la tlaleha litaba tsena. Li hlahelletse kamor’a hore matichere a mo hlokomele a ntse a lla, eaba o tsoa ka tsona. Ena ke tlaleho ea mofuputsi oa nyeoe – Sajene Ramoea.
Ho sa le joalo, polelo ea sepetlele e re: “Re lemoha ka moo taba ena e leng hlokolosi ka teng le hore e ama lebitso la sepetlele le basebelisi ba sona joang hammoho le sechaba ka kakaretso.
“Re thakhotse lipatlisiso tsa rona kahara sepetlele tabeng ena ‘me hang ha re qetile ka tsona, re tla nka likhato tse lokelang. Leha re nena liketso tsa tlolo ea molao tse ka etsoang ke sepetlele kapa basebetsi ba sona, empa re utloisisa hore taba ena e makhotleng hore a etse qeto ho fumana hore moqosuoa o molato kapa che.
“Kahona, re ke ke ra nka qeto holima liqoso tse boletsoeng holima mosebeletsi oa rona hofihlela re phethela lipatlisiso tsa rona le makhotla a fane ka kahlolo nyeoeng ena. Re ipapisa le temana ea molao oa motheo hore motho ha a molato hofihlela makhotla a mo fumana a le molato.
“Re batla ho supa hape hore botlokotsebe ha bo tsebe mohlobo oa motho; haeba ea tlotseng molao ke moahi oa Lesotho kapa molata, botlokotsebe ke botlokotsebe. Kahona, ho fosahetse ho hlasela sepetlele kapa ngaka e qosoang hoba ho thoe ke molata. Ngaka e qosoang e phetse Lesotho mona lilemo tse fetang 20 ebile e se e fuoe bojaki naheng ena ‘me e na le lebitso le letle le e-s’o thunthetsoe ke letho litabeng tsa botloli ba molao.
“Liqoso tse mo tobileng ha li amane le boleng ba hore ke motho oa naha efe. Ha ho le joalo, re khoba sechaba matšoafo hore maikemisetso le sepheo sa sepetlele ha li ea fetoha; e leng ho fana ka litšebeletso tsa bophelo tse tsoileng matsoho tseo mang kapa mang a ka li fumanang kahara naha ena. Re boetse ka phatla e phahameng re tiisetsa bakuli ba rona hammoho le ho ikobela melao ea naha maemong a botho le a mosebetsi.” E rialo polelo ea CEHAL ea la 6 Tšitoe 2023.
