SEHAPI O QHOLOTSA MOLAO OA QOMATSI
Ka moqolotsi oa rona
La 19 Mots’eanong 2023
Kamora phatlalatso ea ho kenya tšebetsong qomatsi e khinang motsamao oa sechaba ho tloha ka 10pm ho isa 4am ka la 15 Motšeanong 2023, akhente e loanelang tšireletso ea litokelo tsa botho, Adv. Fusi Sehapi o ngolletse letona la sepolesa, Lebona Lephema hammoho le mookameli oa sepolesa lengolo leo a batlang hore qomatsi e felisoe.
Ho ea ka lengolo la Sehapi, leo koranta e nang le lona, o re haeba ‘muso o ke ke oa mamela boipiletso ba hae o tlil’o hulela ba ‘muso makhotleng a molao.
Mabaka a ka sehloohong a hae ke hore ‘muso o fositse ka ho khina metsamao ea sechaba kaha seo se khahlanong le litokelo tsa mantlha tsa motsamao o lokolohileng ho ea ka molao oa motheo.
“Ke lumela hore ha ‘muso o loantša botlokotsebe, o lokela ho etsa seo o ipapisitse le molao hobane ha o sa etse joalo, o tlo hatikela litokelo tsa sechaba sa Molimo se ikobelang molao empa se se na molato.
“Maikutlo a ka ke hore leha qomatsi ena e le molaong empa e entsoe hampe ho imela batho. Lebaka ke hore e hatikela litokelo tsa sechaba ntlheng ea bolokolohi, tokelo ea ho phela le ho sebetsa ka ho etsa likhoebo tse etsang chelete bosiu. Molao o re tšireletso ea sechaba e lokela ho etsoa hantle, sechaba se sa utloisoi bohloko.
“Ho ea ka maikutlo a ka, mokhoa oa ho loantša botlokotsebe bo itšemmeng ke hore ‘muso o ntše bahlanka ba tšireletso ho polesa bosiu le motšeare.
“Taba e koatisang ke hore re ile ra bona linako tse fetileng ha mapolesa a hlokofatsa sechaba nako eohle ha ho na le qomatsi. Batho ba khenoloa meno, ba tokhotsoa ba qetelle ka ho bolaoa ke bona bahlanka ba tšireletso. Bothata ke hore ha ho melao kapa tiisetso ho sireletsa sechaba khahlanong le litlhokofatso tsena.
“Ka mabaka ana, ke ipiletsa hore ‘muso o fetole qeto ea ho kenya qomatsi ena tšebetsong, eseng joalo haeba ‘muso o satalatsa molala, ke tlo hloka boikhethelo empa ke tla leba makhotleng ho ea kopa thuso teng.” Sehapi o fera lengolo joalo.
