RAMAPHOSA, MOTLOTLEHI BA PHETHOLA LEKOTE POLIHALI
Ka Moqolotsi oa rona
La 23 Motšeanong 2023
Ho bile le tšebeletso Malingoaneng, Mokhotlong ea ho phethola lekote la khaho ea letamo la Polihali le tlil’o ahoa nokeng ea Senqu.
Morena oa Batlokoa, Qetho Sekonyela o ile a amohela baeti ’me a ipiletsa hore morero ona o tsoele sechaba sa Mokhotlong molemo.
Mopresitente oa Afrika Boroa, Cyril Ramaphosa o ile a etsa puo a bolela hore letsatsi lena ke la bohlokoa haholo kaha linaha tse peli; Lesotho le Afrika Boroa li phethola lekote la khaho ea letamo la Polihali le tonnoro e tlo a fetisetsa metsi Afrika Boroa. Ramaphosa o boetse a bontša hore ho tlo ba le borokho bo tlo matha holima metsi nokeng ea Senqu.
“Lesotho mona Basotho ba heso, le na le khauta; khauta ea lona ke khauta e metsi.” Ke Ramaphosa a bua le sechaba se neng se bohile ketsahalo ena.
O ile a bolella sechaba hore Afrika Boroa e itšetlehile ka Lesotho ho fumana metsi. Tebello ke hore khaho ea letamo e fele ka 2028.
“Re tlo bokella R40 bilone ho bona hore morero ona o’a phethahala. Ka litsiane tseo Lesotho le tla li fumana phetisong ea metsi ana, ‘muso oa lona o tlo le sebeletsa. Ha re na fumana metsi ana feela, re tla ‘ne re patale chelete ho ’muso oa lona.
“Ka metsi ana, ka matamo ana le tla be le fumane motlakase hoba rona Afrika Boroa re na le ntho e bitsoa loading shedding ‘me ke joetsuoe hore lona ha le na eona mona.” Ramphosa o tsoela-pele.
“Ke batla ho leboha tona-kholo ea lona ka hobane o ile a ‘ngolla lengolo ke le Pretoria a ntjoetsa ka liporojeke tseo a batlang hore li be teng mona Lesotho. O re liporojeke tseo li tla thusa Basotho kaha a bone hore ho na le kotsi ka mane ka Afrika Boroa ea tlhokahalo ea motlakase.
“Ka thekiso ea motlakase oo le tlo fumana khauta ea bobeli joale e leng motlakase. Afrika Boroa e arolelana metsi le baahisani ba eona e leng metsi a makaalo ka 60%.
“Ha ke phethela ke re morero oa metsi a lihlaba ke letšoao la tšepo kaha ke tlamahano ea linaha tsa rona. Setsoalle sa Lesotho le Afrika Boroa se bohlokoa haholo, ho etsa hore setsoalle sena se re tsoele molemo re linaha tse peli.
“Porojeke ena e ne e eme ho sa bonahale hore e tla tsoela-pele joang; ke leboha matona a rona a entseng hore porojeke ena e tsoelle-pele.” O fera puo joalo.
Ho sa le joalo, tona-kholo Sam Matekane o ile a fana ka puo e khutšoane a lelekella Motlotlehi Letsie III ho tla etsa puo.
Matekane o ile a supa hore e le ‘muso ba thabile haholo ho ba lipaki tšebeletsong ea kajeno ‘me a kopa Basotho hore ba tšehetse morero ona.
Motlotlehi le eena o ile a bontša hore ka khaho ea letamo la Polihali, mothamo oa metsi o tla nyoloha ho ea Afrika Boroa.
A re khopolo ke ho eketsa matla a phehlo ea motlakase Lesotho. A re porojeke e lo hlahisa mesebetsi lichabeng tsa Afrika Boroa le Lesotho.
“Ke motlotlo ho phatlalatsa hore le pele re aha letamo re se re hlahisitse mesebetsi e fetang 6000 ‘me ha re qala ka khaho ea letamo le tonnoro, mesebetsi e tlo eketseha ka 5000.
“Mooloane o hlahlamang oa bohlokoa ke paballo ea makhulo le tikoloho. Bohlokoa ba tikoloho e hloekileng le makhulo a baballetsoeng ke hore metsi a tla lula a kopotsa kaha mehloli ea metsi e hlaha hona moo.” Ke Rabasotho a bua le sechaba.
O phethetse ka ho kopa sechaba sa Basotho ho tšehetsa morero ona. A boela a ipiletsa ho bohle ba tšepetsoeng ho o atlehisa ho sebetsa ka thata.
