PAKI E RE MAHAO O HULANTSOE A THUNTSOE
La 7 Tlhakubele 2023
Nyeoe ea polao ea molaoli oa sesole oa mehleng, Lieutenant General Maaparankoe Mahao e tsoetse-pele maobane e mametsoe ke moahloli Charles Hungwe Lekhotleng le Phahameng la Lesotho, Maseru.
Baqosuoa nyeoeng ena ke Lit. General Tlali Kamoli, Captain Litekanyo Nyakane, Captain Haleeo Makara, Sergeant Lekhooa Moepi, Sergeant Motsamai Fako, Corporal Marasi Moleli, Corporal Mots’oane Machai, Corporal Mohlalefi Seitlheko le Corporal Ts’itso Ramoholi.
Maobane ho kene lipaki tse peli tsa mofapa-hlooho, ea bosupa e leng monghali Thakali Nts’asa (46) le ea borobeli monghali Thabiso Letuka (63). Nts’asa bopaki ba hae e bile feela hore ha a ntse a le motseng oa Ha Lebakae, Mokema ka la 25 Phuptjane 2015 o ne a bone koloi ea 4×4 e ts’oeu e feta ka lebelo le ts’osang e nkile banna ba babeli ka morao ba apere liaparo tse nts’o e leba nqa ea polasi ea Maaparankoe Mahao, Mokema hoseng ka bo hora ea bosupa. O re koloi eo e ile ea khutla e thukhubelitse e se e sa nka banna ba babeli ba neng ba palame kamorao.
Ho sa le joalo, paki ea borobeli Thabiso Letuka o re o ne a ntse a le mosebetsing ‘mileng ba ntse ba lokisetsa ho kenya mats’oao a tsela. Letuka o re o ile a bona ho feta teraka e nyenyane ea ‘half truck’ ea moetso oa Nissan nakong eo ba ntseng ba sebetsa tseleng e lebang Mahlabatheng.
![Mohla lepato la Mahao, Mokema [Leihlo la Basotho]](https://leihlolabasotho.co.ls/wp-content/uploads/2023/03/DSCN5386-scaled.jpg)
Mohla lepato la Mahao, Mokema [Leihlo la Basotho]
“Kaha li fetile ka tsela e sa tloahelehang ke ile ka ema ka li talima; li ile tsa ‘makatsa hoba li fetile k’honeng e mpe ka tsela e ileng ea ‘makatsa. Ke bone koloi e ‘ngoe e feta ‘half truck’ e e koalla tsela.
“Re ne re tlameha ho tsoela-pele ka ts’ebetso ea rona empa re ile ra tlameha ho emisa ho tsepamisa mahlo ho se etsahalang likoloing tseo hoba re bone ho etsahala morusu o bakoang ke likoloi tse tharo tse fihlileng tsa koalla ‘half truck’ eane.
“Likoloing moo ha nka ba ka hlokomela hantle hore nka hakanya ho ne ho na le banna ba bakae mono.
“Ho ile hoa e-ba le molumo oa sethunya eaba ke bona batho ba babeli ba theoha ka lehlakoreng la bapalami terakeng ba tsoa ba baleha.
“Ke moo ke boneng batho ba neng ba ntse ba tsamaea ka likoloi tsa li-‘twin cab’ ba se ba bokane mane koloing ea teraka eaba ke utloa ho lla sethunya lekhetlo la bobeli. Ha sethunya se luma lekhetlo la bobeli, ke bone banna bane ba neng ba baleha ba khutla ba nyoloha ba phahamisitse matsoho.
“Ke bone ho ba le morusunyana pela teraka e nyane ka lehlakoreng la moqhobi ‘me ka bona ho hulanngoa motho moo banna ba neng ba khobokane teng. Ke hlokometse hore banna bao ba ne ba hulanya motho ea neng a hlaha ka terakeng ka mane ba mo isa koloing ea bona e ka pele. Ba ne ba sa mo nka empa ba ne ba mo hulanya. Motho eo o ile a kenngoa ka koloing eo e ka pele eaba ba tsamaea ka eena. ” Ho rialo Letuka, paki ea borobeli.
Nyeoe e tsoela-pela.
