‘MUSO O TSOA PUO KA KOLUOA TSA BASOTHO RSA
La 27 Phuptjane 2023
Letona la Machabeng, Lejone Mpotjoane le oa mphato oa hae, Mohlomi Moleko, letona la Lirafshoa ba bile le ‘moka oa litaba maoba ho beha Basotho leseling ka likoluoa tse peli tse hlahetseng Basotho Afrika Boroa.
Mohlomi Moleko, letona la Lirafshoa
Taba ea pele letona Mpotjoane o ile a hlalosa tsietsi e oetseng Basotho ba 31 ba timelletseng morafong o koetsoeng Shaft No. 5, Virginia, Welkom, ha tsietsi ea bobeli e le ea mollo e oetseng basebetsi ba lifeme tsa China City le Buy and Pay mane Newcastle, Durban ka Moqebelo oa la 24 Phuptjane 2023.
Mpotjoane o re kamora ho fumana tlaleho ea kotsi ea morafo ba ile ba kopa ‘muso oa Afrika Boroa ho thusetsa hore litopo li nyolleloe kantle ho mokoti.
“Ke ile ka etela Afrika Boroa ho bua le letona la machabeng ‘m’e Naledi Pandor hore ba thuse ‘muso oa heso hore litopo li nyolloe.” Ho rialo Mpotjoane.
O boetse a supa hore letona la lirafshoa, Mohlomi Moleko o ile a etela Welkom ho ea hlahloba boemo a felehelitsoe ke liofisiri tse ling tsa ‘muso oa Lesotho.
Mohlomphehi o teketse baqolotsi hore letona Moleko o ile a bolella liofisiri tsa Majoro oa toropo ea Welkom hore ‘muso oa Lesotho ha o tšehetse liketso life kapa life tsa botlokotsebe.
“Ka la 23 Phuiptjane 2023, moifo oa mohlomphehi Moleko o ile oa ba le phutheho le motlatsi oa mookameli oa lekala la lirafshoa tikolohong ea Foreistata. Phuthehong ena ho bile le mafapha a fapaneng joalo ka litsebi tsa merafo le boemeli ba basebetsi ho sheba hore na ho ka thusoa banna bao joang.” Ke Mpotjoane a tsoela-pele.
O ekelitse ka ho hlalosa hore liofisiri tsa ‘muso oa Lesotho li tlohile moo li kholisehile hore bafu ba tla ntšuoa ka tšebelisano-‘moho le mafapha ‘ohle a amehang.
Lipuisano li hlalosoa e bile tse mofuthu lipakeng tsa naha ea Lesotho le Afrika Boroa. Mpotjoane o boetse a re ba tšepa hore kamora nako e sa felising pelo Basotho ba tlo fumana thuso.
“‘Muso oa Afrika Boroa o tiiselitse moifo oa Lesotho hore o tla etsa tsohle tse matleng a oona ho thusa hore banna ba tšoasehileng ba tla thusoa.”
Mpotjoane o boetse a tiisetsa Basotho hore mebuso e ‘meli e tšoere ka thata hore beng ka bafu ba tle hae ba tlo fumana poloko e hlomphehang.
H’a hatela pele Mpotjoane o fane ka tlaleho hore Moqebelo oa la 24 Phuptjane 2023 ho bile le Basotho ba amehileng kotsing ea mollo o ileng oa qhoma lifemeng tsa China City le Buy and Pay, Newcastle, Durban. O re basali ba babeli ba Lesotho ba ile ba shoa sepetlele ha ba bang ba ile ba kena sepetlele ka maqeba a mabe ’me a re maemo a bona a hlobaetsa.
Ts’enyo e bakiloeng ke mollo lifemeng tsa New Castle [Foto: Newcastillian News
“Liofisiri tsa heso tse Durban li lisitse maemo moo. Ke rata ho supa hore ‘muso oa Lesotho o tekenne selekane le Millennium Challenge Corporation (MCC) ho tla bula lifeme koano Lesotho ‘me ho tlo hiroa Basotho ba bangata.” O lihella likhala joalo a bile a tšelisa malapa a amehileng. “Ke tšelisa malapa a lahlehetsoeng likoluoeng tsena tse peli.”
Ho sa le joalo, letona la Lirafshoa Afrika Boroa, Gwede Mantashe o ile a etela morafong Shaft No. 5 Virginia ho lekola maemo ‘me o itse ba utloile motsamao ka mpeng ea lefatše ka hona ba belaela hore ho na le banna ba ntseng ba phela ba tšoasehileng mpeng ea lefats’e moo kotsi e etsahetseng teng. Bala litaba tseo ka botlalo 👉🏾 MONA.
Morafo o koetseng oa Shaft No.5 Virginia
