‘MUSO O TLO THEHA LEKHOTLA LA BACHA
Ka Moipone Makhemeng
Tlhokahalo ea mesebetsi kahara naha ea Lesotho e tlalehoa e hloele mekoalaba ka tsela e tšosang ‘me e bonahala e khitlile bacha maling-a-mpa habohloko. Bacha ba naha ea Lesotho ho ea ka polelo e tekiloeng ke letona la Tekano, Bacha, Lipapali, Bochaba, Bonono le Ntšetso Pele ea Sechaba, Mohlomphehi Pitso Lesaoana, ba buletsoe ho isa likopo tsa mosebetsi lekaleng leo hape ba bontše litsebo tsa bona.
Phala ea lekala lena monghali Maqalika Matsepe ha a teka taba ena puisanong le moqolotsi oa Leihlo la Basotho, Moipone Makhemeng o totobalitse hore ho na le leano le tlil’o kena tšebetsong e leng Lekhotla la Bacha (Youth Council). Matsepe o hlalositse hore leano lena le tlil’o shebana le tsamaiso ea litaba-tabelo tsa bacha ka katloloho.
O bontšitse hore kahara kemeli ea lekhotla leo ho tla ba le boemeli ba bacha ba nang le bokooa, ba tsoang likolong tsa thuto e phahameng, likerekeng ka ho fapana ekasitana le boemeli ho tsoa mekheng le makhotleng a lipolotiki kahara naha.
Matsepe o bontšitse hore morero ke ho kenya leano leo tšebetsong kamora ho tekoa hoa likhakanyo tsa lichelete ke letona la lekala lena. Matsepe a bontša ha morero ona o ile oa reroa ka selemo sa likete tse peli le metso e ‘meli (2012). O hlalositse hore ba ile ba thula thaba ha ba lokela ho le kenya tšebetsong kaha ho ile hoa e-ba le qaka ha ba lokela ho le thakhola.
Monghali Matsepe o re ba tlo theha Lekhotla la Bacha
A toboketsa hore selei se ile sa khitla lejoe kaha seka-molao se bileng teng se ne se na le bokooa. A etsa mohlala ka hore sekhoqetsane seo se ne se bontša hore ho kene bacha ba babeli ho hlaha mokheng oa lipolotiki o nang le bongata kahare ho Ntlo ea Bakhethoa ba Sechaba.
Mohopolo oa ho theha lekhotla lena o fihletsoe kamora hore ho fihle tlhokomelong ea Lekala hore leano le kentsoeng tšebetsong ka selemo sa likete tse peli le metso e robeli (2008) le neng le reretsoe ho fa bacha koetliso le shebaetse le sa sisinya palo ea bacha ba kentseng likopo tsa mesebetsi e kaalo ka likete tse mashome a mabeli (20 000) kaha ba nka feela lekholo le metso e leshome (110) ‘me kamorao ho koetliso eo Matsepe o hlalositse hore First National Bank (FNB) e ee e imolle ka ho hira bacha ba bang athe ba sa hiroeng e-ba mesarelo feela.
Matsepe o ferile litaba ka ho supa hore ho ntse ho na le maano a mang a sebelisoang ho thusa bacha ho itšematlela ho kenyeletsa le leng le bitsoang Youth Compact leo ka lona ba khahlametsang bacha ka litsiane tsa ho iqalla likhoebo ‘me litsiane tseo li hakanyetsoa ho likete tse mashome a mane tsa maloti (M40 000) motho ka mong ea thusoang. O itse lik’hoebo tse ling tse kholo li ee li tlatsetse katlehisong ea morero ona joaloka K’hamphani ea Thitelo ea Mothamahane (Maloti Mountain Brewery) e ileng ea thesemetsa M100 000.
