‘MUSO O THAKHOLA LIKHAKELETSI HAPE
La 20 Phuptjane 2023
Letona ofising ea tona-kholo, Limpho Tau, o manollotse tsela ea tšebetso eo Basotho ba tlo hiroa ka eona kamora qeto ea ‘muso ho thakhola bocha morero oa boikhohollo bofumeng. O itse sechaba se tlo hiroa ho sebetsa likhakeletsing literekeng tsohle ho tloha mafelo a khoeli eona ena.
Oa hlalosa a bua seea-le-moea-ponong sa ‘muso: “Ke libaka tse peli kapa likhakeletsi tse peli tse tla kena tšebetsong lebatooeng ka leng mabatooeng a 14 kahara lekhotla la motse-moholo oa teropo ea Maseru. Athe mabatooeng a mang a 66 naha ka bophara e tla ba likhakeletsi tse tharo lebatooa ka leng.
“Ho latela moralo, sekhakeletsi ka seng se tla ba le basebetsi ba 21, e leng mookameli oa sekhakeletsi (supervisor), mookameli oa tšebetso (foromane), mongoli le ‘moloki oa thepa hammoho le basebetsi ba 17 sekhakeletsi ka seng.” Ke Tau a hlalosa.
O boetse a manolla hore basebetsi ba tla kena ba suthele ba bang khoeli le khoeli. A re khoeli e tla nka matsatsi a 20 a tšebetso. Kakaretso ea basebetsi ba tla hiroa khoeli le khoeli e tla ba 4746. Ho feta mona, letona le itse ba tlo nyolla meputso ea basebeletsi ba likhakeletsi ka sebopeho se latelang:
Mookameli (supervisor) moputso o tloha ho M3000 o nyolleloa ho M3100.
Liforomane, bangoli le baboloki ba thepa moputso o tloha ho M1200 o nyolleloa ho M1400.
Basebetsi bohle moputso o tloha ho M1200 o nyolohela ho M1300.
Mohlomphehi o lihelletse likhala ka ho hlalosa hore baokameli ba likhakeletsi ba tlo koetlisoa ho tloha ka la 21 Phuptjane 2023. A re ngoliso ea khiro e tla qala ka la 26 – 29 Phuptjane 2023 ‘me hang kamora moo batho ba tlo qala mosebetsi.
