‘MUSO O THAKHOLA LEANO KHAHLANONG LE TLHEKEFETSO MOSEBETSING
Ka Moipone Makhemeng
La 28 Phupu 2023
‘Muso o tšoere phutheho maobane hoteleng ea Avani Maseru ho thakhola leano le reretsoeng ho fenya tlhekefetso ea bong mosebetsing (Gender-Based Violence and Harassment at Work) ‘me leano leo le bitsoa Multilateral Partnership for Organising, Worker Empowerment, and Rights (M-POWER).
Phuthehong ena ho bile teng balekane ba ‘muso ho hlaha Boemeling ba Ntlo ea Amerika Lesotho, Mokhatlo oa Linaha tsa Kholiso ea Moruo Afrika e ka Boroa (SADC) ekasitana le mafapha a mang a machaba. Tebello ke hore ‘muso o tla tšoarana ka matsoho le basebetsi ekasitana le bahiri ho bona hore litokelo tsa basebetsi li’a hlomphuoa. Sepheo sa mantlha ke ho felisa tlhekefetso ea bong mosebetsing.
Tona-Kholo Ntsokoane Matekane o butse phutheho ka mantsoe ana; “Kaofela re lipaki tsa liketsahalo tse ntseng li eketseha tsa tlhekefetso ea bong le tlhekefetso ea motabo mosebetsing. Taba ena ha e etsahale mona feela empa e phatlalletse le kontinente ea rona e ratehang.
“Kahona, ketsahalo ena, e re fa monyetla o motle molemong oa rona bohle. Re lokela ho rarolla le ho hlola mathata a re tšoenyang. Ke bolele hore Lesotho le tšehetsa litokelo tsa basebetsi ka morero oa ho phahamisa mosebetsi o motle.” O rialo Matekane.
Hlooho ea ‘muso e botse ea re litokelo tsena li sirelelitsoe ke molao oa motheo oa Lesotho ‘moho le melao e meng. A re li boetse li sirelelitsoe ke melao ea Machaba a Kopaneng (UN), Mokhatlo oa Machaba oa Basebetsi (ILO), Kopano ea Linaha tsa Afrika (AU) le Mokhatlo oa Linaha tsa Kholiso ea Moruo Afrika e ka Boroa (SADC).
H’a tsoela-pele o ile a supa hore ‘muso o litulong o pharaletse ka maemo ‘ohle a bosebetsi ho kenyeletsa liofisiri tsa sechaba. O ile a tiisetsa machaba hore ‘Muso oa Lesotho o ananela ntlafatso ea basebetsi e lebisang ntlafatsong ea moruo.
Ba bileng le seabo ‘mokeng
“Re lumela hore basebetsi bohle ba lokela ho sebetsa tikolohong e hlokang tlhekefetso. Ka lebaka lena, Lekala la Bosebeletsi ba Sechaba, Bosebetsi le Khiro li phethetse litataiso tsa ho thibela tlhekefetso ea motabo e leng Prevention of Sexual Exploitation Abuse and Harassment (PSEHA) ka tšehetso ea UNDP.”
Matekane o hlakisitse hore ILO e fane ka tšehetso ho ‘muso oa Lesotho e le ho etsa bonnete ba hore lisebelisoa tse fanoeng li ea sebelisoa.
“Lekhotla la Matona le seka-sekile tlhahiso mabapi le lipehelo tsa Molao oa Basebetsi ba ‘Muso (Public Service Act) tse lokelang ho hlomathisoa molemong oa ho ikamahanya le maemo a mantlha a mosebetsi.”
Ha a lihella likhala, o boetse a supa hore molao o ntlafalitsoeng oa basebetsi o tla phetheloa mafelong a Loetse 2023. A re ona ke molao o mabapi le polokeho le bophelo bo botle mosebetsing le tse amanang le tsona ho sireletsa basebetsi.
Ho sa le joalo, Mokhomishinara oa Lekala la Khiro le Bosebeletsi ba Sechaba, mofumahali ‘Mamohale Matsoso, o bontšitse hore lekaleng la habo ho na le meoloane e behiloeng ho tataisa litabeng tsa tlhekefetso ea bong.
‘Mamohale Matsoso, Mokhomishinara oa Lekala la Khiro le Bosebeletsi ba Sechaba
“Hajoale re mothating oo re itseng mekhatlo ea basebetsi le ea bahlanka ba ‘muso e shebe likateng tsa molao oa Convention 190. Re kopile hape mekhatlo ea machaba ea basebetsi hobane re na le selekane le eona. Ntho tsohle tsa rona tse amanang le tlhekefetso li lokela ho itšetleha ka molao ona.” Ho rialo Matsoso.
O totobalitse hore Lesotho le tekenetse molao ona ka Tlhakubele monongoaha ka tebello ea hore o tla sebetsa ho tloha Tlhakubele 2024. O boetse a supa hore ka selemo sa 2025 ba tla fana ka tlaleho ho ILO hore na ba o kentse tšebetsong joang. Ba tla boela ba tlalehe hore ba fihletse likatleho life ho latela lipehelo tsa bona.
Ho feta mona, lebitsong la basebetsi ba lifeme, mofumahali Popoti Ntebe o ile a fana ka maikutlo a bona litabeng tse amanang le tlhekefetso ea bong ho tloha tšebetso e thakhohile. Har’a tsona o tobokelitse taba ea tlhekefetso ea motabo eo a itseng e bakoa ke ho tsieleha hoa tlhokahalo ea mosebetsi. Eena o li behile ka tsela e lateleng;
Popoti Ntebe, moemeli oa basebetsi ba lifeme
“Ke le mosebetsi oa feme ea Shein, ke ile ka ithuta hore litšoso le tlhekefetso ea mantsoe li etsoa haholo ke baokameli le botsamaisi ka lebaka la maemo le balaoli. Nakong e fetileng hore motho a sebetse u ne u tla fumana hore batho ba ema keiting mono ebe baokameli ba tla atamela keiting ba hire.
“Ba ne ba hira feela ba lumetseng ho etsa thobalano le bona. Athe ba hanang ba ne ba sa hiroe.”
Ha a lihella likhala, Ntebe o otlollotse hore le likonteraka tseo ba neng ba li tekenela e ne e le tsa likhoeli tse tharo feela. Ha motho a ne a sa kene thobalanong le mookameli konteraka ea hae e ne e khaoloa.
O phethetse puo ea hae, ka ho supa hore hang hoba maano a thibelo ea tlhekefetso ea bong a kene tšebetsong libakeng tsa mosebetsi, liphetoho li bile teng le hoja litlhekefetso tsena li ntse li e-s’o felle ruri.
