‘MUSO O RE O TLO RIPITLA TLALA TEMONG EA MARIHA
Ka motlalehi oa rona
La 6 Mots’eanong 2023
Nako ea temo ea mariha e atametse ‘me letona la Temo le Kanetso ea lijo, Thabo Mofosi o phatlalalitse ‘mokeng oa baqolotsi ka Labohlano hore nalaneng ea Lesotho ea temo, ba ikemiselitse ho tla thusa lihoai ho hlahisa chai e-s’o bonoe le ho khahlametsa lihoai ka litheolelo manyolong le lipeong.
Mofosi o ile a hlalosa hore chebelo-pele ea bona temong ea mariha e fupere khora. O ipilelitse ho lihoai hore li ee masimong ka bongata kaha ‘muso o ikemiselitse ho tla fetola mekhoa ea khale ea temo kaha ba tlil’o bona hore lihoai li hlahisa chai ka bongata.
Thabo Mofosi, letona la temo
Letona le thathamisitse litheolelo tse tlo fuoa lihoai thekong ea manyolo a re mokotla oa 50kg o tla rekisoa M149 e leng theolelo ea 80% feela a ipiletsa ho lihoai hore li reke manyolo ao molemong oa temo ea mariha feela. A hlalosa hore ho tla ba le litheolelo lipeong tsa koro joaloka PAN 3161 25kg ke M211, Matlabas 25kg ke M280 athe Green Feast (10kg) e tla rekisoa M250.
“Ho nyolla chai, re tlo isa mobu litekong hore o hlahlojoe ‘me re lebeletse ho hlahisa chai e ngata hona mobung oo. Mohato oa pele oa ho thusa lihoai ke hore ka Laboraro la beke e tlang re ilo tšoara lipontšo tsa temo mane Kolonyama, Leribe ka sepheo sa ho ea bontša lihoai hore li sebelise mechini ea temo joang.
“Kolonyama moo ke hona moo re ilo tlamahana le lihoai ho ba le temo-‘moho kapa maboloko. Re tlo sebetsa ‘moho le libanka le bo-raliterekere ba ikemetseng. Libanka tsona re li ferehile hore li thuse lihoai ka mekitlane bakeng sa temo ena.” Mofosi o li behile joalo.
O boetse a re ba ntse ba lokisetsa ho tlabola selekane le sesole sa Lesotho molemong oa hore masole a tlo rupela mahokela le tsela ea ho tlaleha litlolo tsa molao tse ka etsahalang masimong.
“Re etsa khoeheletso ho lihoai ho kena temong ena kaha re na le ‘maraka o hlakileng le Lesotho Flour Mills hore ba tlo reka koro ea Basotho kaha re tlo thusa lihoai ho hlahisa koro ea boleng.
Letona le re lihoai li tlo phethola masimo ka ‘ripper’ ho boloka mongobo [Foto- Shutterstock]
O boetse a re lihoai li tlo fuoa monyetla oa ho boloka koro ea tsona lisiung tsa Lesotho Flour Mills athe literekeng li tla boloka koro lisiung tsa Lefapha la Likoluoa. “Ha lihoai li bolokile koro lisiuong tseo li tla thuseha le ho rekisa le nako e tlang, ho qoba hore lihoai li se qhekelloe.
“Kaha nako e fetileng koro e ne e senyehela masimong ke khahello ea mechini e helang koro, rona re tlo hlola qholotso ena kaha re tlo beha mechini e helang koro literekeng tsohle hore koro e kotuloe ka nako.
