‘MUSO O LELEKA BASEBETSI BA 74
Ka Moipone Makhemeng
Boieane ba basebetsi ba ‘muso ba ka bang 74 Lekaleng la Likhokahanyo, Tekenoloji, Mahlale le Boqapi ba fumane mangolo a teleko mosebetsing kajeno. Boholo ba basebetsi bana ke ba litsi tsa liphatlalatso tsa ‘muso e leng Lesotho Television, Radio Lesotho le Ultimate FM.
Mangolo a teleko a ngotsoeng ka la 9 Tlhakubele 2023 a baleha joana: “Ho ea ka phatlalatso ea Lekala la Bosebeletsi ba Sechaba le Khiro ea Nomoro ea 12 ea 2022, khiro ea hau e nkoa e le ka thoko ho molao. Kahona konteraka ea hau e khaoloa ho tloha ka la 14 Tlhakubele 2023.
“Leha ho le joalo, u tla hiroa nakoana e leng nako ea khoeli le halofo e tla qala ka la 14 Tlhakubele 2023 hofihlela ka la 30 ‘Mesa 2023.” Le baleha joalo lengolo le ngotsoeng ke Mongoli e Moholo oa lekala leo, monghali Lira Moeti.
Kaha bahlanka bana ba ne ba ba hiruoe ka likonteraka e bile masoabi ha ba fumana mangolo a reng ba arohane le tšebetso kamora ho khaoloa hoa likonteraka tsa bona.
Ho ea ka Mongoli ea Ikhethang oa letona lekaleng leo, monghali Thabang Rapapa o hlaloselitse moqolotsi oa koranta ena Moipone Makhemeng hore ho felisoa hoa likonteraka tsa basebetsi ba lefapha leo ho tlisoa ke ho se be molaong hoa tsona.
Monghali Thabang Rapapa o hlalosa mabaka a teleko
Ha a toboketsa taba ena Rapapa o fane ka temoso hore ha ho hiroa basebetsi ba nakoana ho ea ka melao ea konteraka e joalo; khiro ha e ea lokela ho feta likhoeli tse tšeletseng e le tšebetsong.
Monghali Rapapa o re leha ho le joalo lefapheng lena ho bile le tokollo ka lebaka la hore likhoeli tseno li lekane koetliso feela ho latela mechini e sebelisoang. Ke ka hona ba ileng ba ekeletsoa lilemo hore bonyane lilemo tse peli ba sebetse.
A re leha ho le joalo, ba ikarabellang hona joale ba batla ho etsa se nepahetseng. Ho sa le joalo, o hlalositse hore a ke ke a fetola hore na ha e le mona likonteraka li khaoloa na basebetsi bao litsiane tsa bona ba tla li fumantšoa kapa che kaha a se na leseli mabapi le likateng tsa likonteraka tsa bona.
Ha a hlahisa maikutlo a hae, e mong oa liboholi tse tebetsoeng, o bontšitse ha taba ena e ba hlahile lesumatha kaha ba e bolelloa kajeno. “‘Ba ‘muso ba batla re tekene konteraka kahara e ‘ngoe hobane feela ba sa batle ho re fa litsiane tsa rona. Ha ba re leleka ha ba re fe tsebiso ea khoeli tseno tse peli e seng ba e pate ka konteraka ea khoeli tse peli. Haeba konteraka tsena ha li molaong ha se molato oa rona ke oa bona kaha rona ha re na leseli tabeng eno. Ho hlokahalang honajoale ha re tebeloa ke hore re fuoe litokelo tsa rona ke phetho.” Mohlanka ea tebetsoeng o rialo a sa rate ho tsejoa ka lebitso.
Lena ke lengolo la teleko:
Lengolo la Teleko
