‘MUSO O KENYA TS’ISINYO HO ANANELA M5000 EA MAFURA
Leihlo la Basotho – 25 Hlakola 2023
Ha Ntlo ea Bakhethoa ba Sechaba e buloa maobane, letona la Bosebeletsi ba Sechaba, Bosebetsi le Khiro, Richard Ramoeletsi o hlahletse ts’isinyo e tla tekoa paramenteng ho ananela melaoana ea meropotso ea maparamente e ileng ea tekoa ka la 8 Ts’itoe 2022.
Har’a tse ling melaoana ena ke e lumellang bahlomphehi maparamente ho amohela M5000 ea mafura khoeli le khoeli e le ea hore ba ts’ele makoloi a bona. Ho feta mona, Ramoeletsi o boetse o batla hore paramente e ananele melaoana ea meputso ea bahlomphehi ho tloha ka tona-kholo, matona le bahlomphehi ba bang. Ka tsela e ts’oanang, melaoana ena e ne e tekoe ka la 8 Ts’itoe 2022.
Ho sa le joalo, maparamente a mabeli, Teboho Mojapela, moetapele oa Socialist Revolutionaries (SR) le Lekhetho Rakuoane oa Popular Front for Democracy (PFD) le bona maobane ba hlahletse ts’isinyo moo ba batlang hore paramente e lahlele meropotso e meng matjoing joaloka M5000 ea mafura ekasitana le M3000 ea ho lefella matlo.
Teboho Mojapela, moetapele oa SR
