’MUSO, MISA LI FANA KA MATŠELISO KAMORA POLAO EA SEBOHOLI
Ka Moipone Makhemeng
La 15 Motšeanong 2023
Basotho ba tsohile ba aparetsoe ke masoabi hoseng kajeno kamora ho thunngoa le ho bolaoa hoa monghali Ralikonelo Joki, seboholi sa Tšenolo FM, bosiung ba maobane hang ha a chaisa lenaneong, Lower Thamae, Maseru.
Ho ea ka mookameli oa seea-le-moea se amehileng, Mshengu Tshabalala, Joki o timetse hang kamora ho fafatsoa ka lethala la likulo ke bo-rasethunya ka bo-9:30pm.
A bua le bophatlalatsi kajeno Tshabalala, o hlalositse joana: “Ntate Ralikonelo re fumane a thuntsoe hampe feela ‘me o thunyelitsoe keiting ea seea-le-moea moo eitseng hang-hang ha a qeta ho tsoa ka seea-le-moeeng a tsoela kantle’mileng, tlaleho e bontša ha batho ba babeli ba ne ba mo emetse mono hekeng ‘me ha a hlaha ba bonahetse ba thunya bobeli ba bona; e mong ka letsohong le letšehali e mong ka ho le letona.
“Kamor’a ketsahalo ea hore a thunngoe, koloi ea hae ho bonahala e ile ea lahleheloa ke taolo, eaba e qetella e tšela tsela ea iIl’o thijoa ke mabenkele a ka lehlakoreng la bohaisane la tsela.
“Re fumane koloi ea hae e le hona mono. Kamoo re fumaneng ka teng o ile a hla a fella hona mono hobane o fumanoe a se a kakaletse ka koloing a felletsoe ke bophelo.” Tshabalala o hlalosa joalo.
Ho sa le joalo, Leihlo la Basotho le buisane le molula-setulo oa mokhatlo oa bophatlalatsi Lesotho- Media Institute of Southern Africa (MISA) Lesotho, monghali Kananelo Boloetse ea bontšitseng mokhatlo o saretsoe haholo ke lefu la Joki.
“Ke taba e re tšositseng haholo ena hoba e boetse e re hopolitse hore mosebetsi oa boqolotsi ba litaba ke mosebetsi o kotsi haholo. Re bona hore batho ba bang bao ho tlalehoang litaba ka bona ba nahana hore mokhoa o ka etsoang hore litaba tsa bona li se tlalehoe ke hore ba bolaee ba li tlalehang ‘me taba ena e re tšosa haholo.
Kananelo Boloetse – molula-setulo oa MISA-Lesotho [Foto – Informative]
“Re belaela lefu la hae le bakiloe ke litaba tsa mosebetsi oa hae oa bophatlalatsi hobane ho tloha hoseng esale ke ntse ke bontšoa melaetsa ea khale ea marangrang hore ba neng ba tletleba ka eena ba ne ba tletleba ka mosebetsi oa hae oa bophatlalatsi. Ba llang ka eena ba ne ba sa lle ka litaba tse ling mohlomong hore fariki ea hae sentse kae-kae.
“Lehoja sepolesa e le hona se tlo etsa lipatlisiso, liposo tseo tsa marangrang, hoba tse ling li ne li re Ralikonelo o tla qetella a thibellelitse ka nama ea hae.” Boloetse o phethela litaba tsa hae ‘me o boetse a fitisa matšeliso ho lelapa la Joki ekasitana le Seea-le-moea sa Tšenolo.
Lebitsong la Lekala la Likhokahanyo, Mongoli ea Ikhethang ofising ea letona la likhokahanyo, Monghali Thabang Rapapa o hlahisitse maikutlo a lekala:
Monghali Thabang Rapapa, Mongoli ea Ikhethang oa Letona la Likhokahanyo [Foto: Moipone Makhemeng, Leihlo la Basotho]
“O itse boipotso ba bo-ramatsete e tla ba hore na taba e tjena ke ho tšosa bophatlalatsi ha bo ema tabeng ea ‘nete.
“Taba ena e mpe ’me mohlomphehi letona o tšoela taba ena ka mathe, ’me ’muso o tšepisa ho tla hlaola taba ena hoba lefu le mofuta ona ke la pele pusong ena kaha ho so ntso kentsoe linala fatše ho fumana baetsi ba ketso ena.” Ke Rapapa eo.
