‘MOSHARA OA NALEDI O KHOBA SECHABA MATŠOAFO
Leihlo la Basotho News – La 1 Tlhakubele 2023
Kamora hore mookameli oa ‘moshara oa Naleli Funeral Planners, Thabiso Maliba (49) a hlahe lekhotleng la ‘maseterata kajeno, boto ea tsamaisa ea ‘moshara ona e ile ea tšoara ‘moka oa batlalehi ba litaba. Sepheo e ne e le ho tla hlakisa litaba tse ‘maloa ekasitana le ho khoba matšoafo sechaba sa Basotho ka lietsahala tse bosula tse etsahetseng kahara k’hamphani eo.
Ikhetheleng Matabane
Monghali Malefetsane Tlelima, molula-setulo oa boto ea tsamaiso o ile a bala polelo ea bona tjena: “Bo-‘m’e le bo-ntate, re le Naleli Funeral Planners re bone hore mookameli-kakaretso oa rona, Monghali Thabiso Maliba ea bileng a behelletsoeng ka thoko ho tšebetso ka la 12 Pulungoana 2022 ka mabaka a tšebetso kaha a belaelloa litabeng tse kholo kahara k’hamphani, o hlahelletse ka khotla tsatsing lena, a qosoa ka pelaello ea ho nkha lefotha lipolaong tse soto tsa basebetsi-‘moho le rona; ntate Ikhetheleng Matabane e leng our Chief Finance Officer le ‘m’e ‘Maserema ‘Makong, our Finance Manager.
Thabiso Maliba, mookameli oa Naleli Funeral Planners
“”””
Re le bookameli le tsamaiso ea k’hamphani ena re masoabi ebile re tšoela ka mathe ketso ena e re sithabelitseng maikutlo. Re ikemiselitse ho thusana le mafapha ‘ohle le makhotla a molao ho fana ka thuso lipolaong tsena, thuso eohle eo ba e hlokang hore baratuoa bana ba rona ba abeloe toka re tla fana ka eona.
“Taba e ‘ngoe ea bohlokoa-hlokoa ke hore re utloisisa hore bareki ba rona le sechaba ka kakaretso se ferekane ke litaba tsena. Le rona re ferekane ke litaba tsena tse bolutu. Re tiisetsa le hona ho netefaletsa sechaba sohle le bareki ba rona bohle ba khabane hore lichelete tsa bona li ntse li sireletsehile ebile li matsohong a nepahetseng.
Naledi Funeral Planners, Polelo
“Khoebo ena e na le tsela ea tsamaiso eo e tsamaisoang ka eona e hlakileng. Re na le governance structure, cooperate governance structure tse hlakileng hore na taba ea tsamaiso ea k’hamphani e sebetsa joang. Naleli Funeral Planners e na le li-share holders tse 17 or so. Ke batho ba bangata ba tsetetseng mona; banna ba Basotho ba ile ba ikopanya. Re khethile ho bona hore ba bang ba tsamaise k’hamphani ena e leng board of directors.” Tlelima o rialo.
O ile a qetela ka ho toboketsa hore tsamaiso ea Naleli Funeral Planners ha e ea lula mothong a le mong. A supa hape hore ba tla emela makhotla ho phethela mosebetsi malebana le nyeoe ea Maliba. O itse monghali Mosoeu Mabote ke eena ea ts’oereng mokobobo e le mookameli-kakaretso kamora hore Maliba a behelloe ka thoko ho ts’ebetso.
