MOPARAMENTE O LEMALA KOTSING EA KOLOI
La 14 Tlhakubele 2023
Litsela tsa Lesotho matsatsing ana ha ho oa bolokeha ho tsamaea ho tsona haholo bosiu. Bothata bo boholo ke likoti le malumelahali a bulehileng kahara litsela naha ka bophara ka lebaka la lipula ekasitana le ho se lokisoi khafetsa hoa litsela nako e telele. Bothata bo bong bo hlalosoa e le litsela tse sa tlotsoang ka pente e tšoeu hare ho tšoaea mahlakore ekasitana le matšoao a mang a tsela a sieo kapa a sentsoeng.
Kotsi e etsahetse ‘mileng ona
Ho bile le tsietsi bosiu ba Labohlano la la 12 Tlhakubele 2023, ha e mong oa maparamente ho hlaha mokheng oa lipolotiki Revolution for Prosperity (RFP), ha Mohlomphehi Dr. Tšeliso Moroke a ameha kotsing ea koloi.
Ba boneng ketsahalo ba bolelletse Leihlo la Basotho News hore koloi ea moparamente le e ‘ngoe li ile tsa thulana sa lipheleu ‘mileng o hlahang Lekhalong la Qoatsaneng. Moroke ke mokhethoa oa RFP ho tsoa lebatooeng la Matala #41.
Ba boneng ka mahlo ba re likoloi ka bobeli li senyehile hampe ‘me mokhethoa le moqhobi oa koloi e ‘ngoe ba lemetse hampe. Bobeli ba ile ba potlakisetsoa sepetlele. Koranta ena e batlile lehlakore la raliphatlalatso oa sepolesa sa Lesotho, Senior Superintendent Mpiti Mopeli ea bontšitseng hore tafoleng ea hae ha e-s’o fumane tlaleho ea kotsi ena.
