MOLETSA-PHALA EA HLOAHLOA O TIMETSE
Ka Moipone Makhemeng
La 10 Motšeanong 2023
Lelapa la Mohlakala, baletsa-phala, barati ba papali ea bolo Lesotho hammoho le Mokhatlo oa Bolo ea Maoto Lesotho (Lesotho Football Association (LeFA), ba aparetsoe ke leru le letšo kaha moletsa-phala ea hloahloa oa mehleng monghali Tšeliso Gerald Mohlakala (60) o fetile lefatšeng le ka koano ka la 6 Motšeanong 2023.
Mofu o hlahetse Sebalabala, Berea ka la 1 Pherekhong 1963 ‘me a holela teng le libakeng tse ling joaloka Buthe-Buthe. E bile setho sa sepolesa sa Lesotho a nt’o titimela hape mosebetsing oa boletsa-phala tlas’a mokhatlo oa Lesotho oa Bolo. Mona o sebelitse e le moletsa-phala, mothusi oa moletsa-phala. Lefu le mo khaoletsa a sebetsa e le mohlahlobi oa baletsa-phala.
Mofu Ntate Tšeliso Gerald Mohlakala
Leihlo la Basotho maobane le buisane le mora oa mofu, monghali Tebello Mohlakala ‘me eena o hlalositse ntate oa hae e ne e le motho oa bolo empa ntle ho moo nakong eo a neng a le mosebetsing oa bopolesa o ne a ithukhubelitse ‘minong kaha e ne e le karolo ea sehlopha sa liphala tsa sepolesa motebong oa Ha Mabote lefapheng la matšolo a ikhethang (SOU) e le Police Inspector.
Lefu le mo khaolelitse ka la 6 Motšeanong 2023 ‘me se mo nkileng ke ho hloleha ha liphieo. “Ntate o ne a kula a na le bothata ba liphieo, ‘me sesosa sa lefu ke ‘kidney failure’. Mora mofu o hlalositse joalo.
Ho ea ka mora, takatso ea lelapa ke ho mo beha borokong ba ho qetela ka la 27 Motšeanong 2023. “Re il’o mo bolokela koana lapeng habo Sebalabala.
Ho sa le joalo, Leihlo la Basotho le nontse maikutlo e mong oa baletsa-phala ba sebelitseng le mofu, Monghali Mohau Sentšo ‘me o hlalositse mofu e ne e le motho ea ratang mosebetsi oa hae ka pelo ea hae eohle.
Oa nama: “Ke fihlile tšebetsong ea boletsa-phala ka 1997 ‘me ke fumane ntate Mohlakala a se ntse a le tšebetsong a sebetsa e le mothusi oa moletsa-phala.
Monghali Mohau Sentšo, moletsa-phala oa Lesotho
“Ntate Mohlakala e ne e le motho ea laba-labelang hore baletsa-phala ba bacha ba ithute mosebetsi. Hangata o ne a atisa ho re bolella a re ; ‘Rona rea tsamaea re tlo le siea le eona nthoena ea boletsa-phala joale ha le sa ithuti e tla ba mathata.’
Kaha ntate Mohlakala e ne e le lepolesa ka tšebetso, moo ho neng ho le thata kapa baletsa-phala ba tšaba ho ea teng kapa ho utlohala ho na le mororo, Ntate Mohlakala ke e mong ea neng a tšepeloa hore a ka ea sebakeng se joalo. Hape e ne e le motho ea bonolo; a bua, a rata metlae a re hlabolla.
“Ka ho fetisisa e ne e le motho ea ratang mosebetsi oa hae ka pelo ea hae eohle. Mosebetsi oa boletsa-phala o ne a o rata ‘me le pele a hlokahala nakong eo a ntseng a kula u ne u tla ‘mona lebaleng nako eohle.
“O bile a thonyetsoa ho ba molaetsa phala oa machaba, FIFA Referee, ka 2002. Ntho e ka sehloohong eo re tla lula re mo hopola tšebetsong ea boletsa-phala ke hore o ne a sa rate masaoana. Lefu le mo khaoletsa tjena e le Referee Assessor, ‘me ke mosebetsi oa ho lisa tšebetso ea baletsa-phala ebe o tla fana ka tlaleho ofising.” Ke monghali Sentšo a phethela ka hore ba setseng ba lule ba hopola litataiso tsa mofu e le ho holisa boletsa-phala Lesotho.
