MOKETE OA TSOALO EA KHOSI O KHUTLELA MASERU
Ka Moipone Makhemeng
La 4 Phupu 2023
Monongoaha Motlotlehi Letsie III o tla qeta lilemo tse 60 Molimo a mo file bophelo. Tlotla ea ho keteka letsatsi la hae la tsoalo e tla khutlela motse-moholo Maseru kamora lilemo tse leshome a potoloha le litereke ho keteka letsatsi lena ka la 17 Phupu selemo le selemo.
Letona la Puso ea Libaka, Borena, Litaba tsa Lehae le Sepolesa, mohlomphehi Lebona Lephema maobane ‘mokeng oa bo-ralitaba o hlalositse hore selemong sena mokete o tla tšoareloa lebaleng la Setsoto, Maseru ka la 17 Phupu 2023.
Rabasotho le Motlotlehi Mofumahali ‘Masenate
Lephema o teketse baqolotsi hore e le ho tlotlisa mokete, Motlotlehi o tla fana ka likhau mafapheng a fapaneng a tšebetso sechabeng. O boetse o hlalositse hore ka la 12 Phupu 2023 ho tloha ka 10am Motlotlehi o tla fana ka likhau tsa tšebetso e tsoileng matsoho ho litho tsa mafapha a tšireletso tse ipabotseng ka bosebeletsi bo botle. Ka la 15 Phupu 2023 ka 10am, ho tla ba le mokete oa lipina o tla tšoareloa ‘Mamohato Centre.
Ho feta mona ho tla ba le sehlabelo sa ‘Misa o halalelang ka la 16 Phupu 2023 athe ka la 17 Phupu 2023 mokete o tla ba lebaleng le leholo la Setsoto ho tloha hoseng.
“Sechaba sa heso ha re ithukhubetseng ka matla ho keteka le ho lebohisa Rabasotho ka ho fihlela lilemo tse mashome a tšeletseng (60) a bophelo bo botle. Ha re nkeng monyetla ona ho hopola hore re sechaba sa khomo ‘me re atlehise mokete ka ho thaba ‘moho le Rabasotho.” Lephema oa ipiletsa.
Batlotlehi ba lumelisa sechaba moketeng oa Quthing, 2019
Ho sa le joalo, Mongoli e Moholo oa lekala leo, monghali Tumelo Raboletsi o behile Basotho leseling hore letsatsi lena la tsoalo esale le ntse le ketekoa ka ho potoloha le litereke ho tloha ka selemo sa 2013 ho fihlela hajoale ha le khutlela Maseru.
Raboletsi o hlalositse hore ‘muso o tla etsa qeto hore na letsatsi lena le tla ketekoa ka tsela e joang ho ea pele kamora ho tseba boemo ba likhakanyo tsa lichelete.
