MOHOEBI O LAHLEHELOA KE M10 MILONE KE BOBOLU BA ‘MUSO
La 5 Phupu 2023
Mookameli e bile e le mothehi oa k’hamphani ea lehae ea lifofone, Mohahlaula Airlines, monghali Phafane Nkotsi o re k’hamphani ea hae e lahlehetsoe ke chelete e kaalo ka M10 milone ka lebaka la bobolu ba ‘muso o etelletsoeng-pele ke tona-kholo Sam Matekane.
Nkotsi a bua ‘mokeng oa baqolotsi kajeno, o neng o tšoaretsoe Transformation Resource Centre, Maseru o hlalositse hore ho tloha ka selemo sa 2017 k’hamphani ea habo esale e batla ho sebetsa le merafo ho fana ka litšebeletso tsa lifofane ha merafo e li hloka. O lla ka hore merafo e ile ea hana ho sebetsa le eena hofihlela ‘muso o fetileng o etsa qeto ea ho emisa phano ea lipolomiti ho lik’hamphani tsa lifofane tsa melata tse neng li sebetsa merafong.
Leha ho le joalo taba li ile tsa fetoha ha ‘muso o mocha o kena.
“Mohahlaula Airlines e khahlanong le hore merafo e fuoe tumello ea ho fofisa lifofane tsa nako e khutšoane ka bokunyata. Lipolomiti tsena tsa bokunyata ba li fuoe ke Lefapha la Bofofisi ho tloha ka Pherekhong 2023.
“Ho tloha ka 2017, Mohahlaula e ile ea bona monyetla oa khoebo ea lifofane le ho hlahloba ‘maraka. Re ile ra atamela bo-ramerafo hore ba sebetse le rona ho fana ka litšebeletso tsa lifofane (chartered and aerial services).” Nkotsi oa hlalosa.
O re ho ile hoa tšoaroa liphutheho tse ngata le mafapha a amehang ho kholisa merafo hore ba na le bokhoni ba ho fana ka litšebeletso tsa lifofane ho eona.
“Liphuthehong tsena, lipuo tse makatsang li ile tsa tsoa melomong ea Mok’homishinara oa Merafo le e mong oa baokameli ba merafo. Lipuo tsa bona ke hona ho ne ho hlaka ka Pherekhong 2023 hore li ne li lupa eng. Ke batla ho qotsa seo mokh’omishinara a ileng a se bua: ‘Lona Mohahlaula mona le tobane le batho (giants) e seng meheanyana, ba ke ke ba lumela.’
“Khabareng letona la lipalangoang la nako eo le ile la kena lipakeng le bahlanka ba lekala. Kamora lipuisano re ile ra kopa hore ‘muso oa Lesotho o sebelise litemana tsa molao o laolang merafo le o laolang bofofisi ho laela merafo ho sebelisa lifofane tsa rona ho ea ka lipallo tsa melao ena.”
“Ho feta mona, joaloka k’hamphani ea lehae ea lifofane re na le bokhoni ba ho fa merafo litšebeltso tsa lifofane tseo ba li hlokang.” O tsoela-pele.
Nkosi o re ka bomali-mabe ‘muso o ile oa nka lehlakore la bo-ramerafo oa fana ka lipolomiti tsa bofofisi ho lik’hamphani tsa melata tsa lifofane ho sebetsa le merafo. O seholla ‘muso ka ho rapitlela lipehelo tsa molao ka boomo ka ho tima k’hampani ea habo mosebetsi.
Leha ho le joalo, Nkotsi o teketse baqolotsi hore ba ile ba tletleba ha ‘muso o fana ka lipolomiti. O re ba ile ba atamela mahlakore a ‘maloa ho kopa boeletsi.
“Taba ena e ile ea seka-sekoa ke mahlokore a ‘maloa. Ho tloha ka Loetse 2022, kamora sello sa rona, mookameli oa Lefapha la Bofofisi o ile a emisa phano ea lipolomiti tsa nakoana tsa bofofisi ho likhamphani tsa melata.” Nkotsi o manolla joalo.
Leha ho le joalo, o re ba sa thabetse kemiso ea lipolomiti ho ile hoa kena ‘muso o mocha ka Mphalane 2022.
“Ke moo re ileng ra bona merafo tlas’a sekhele sa lekhotla la merafo ba ngolla letona la joale la lipalangoang ba lla ka hore Mookameli oa Bofofisi o khinne phano ea lipolomiti a le mong; a sa buisana le mafapha a mang a amehang.
“Hamorao ka Pulungoana letona la lipalangoang le ile la kopa tona-kholo (Sam Matekane) ho kena lipakeng. Ka Pherekhong Lekala la Lipalangoang le Mookameli oa Bofofisi ba ile ba kopana le tona-kholo ba hlalosa hore na molao o sebetsa joang mabapi le khang ena.
“Kamora kopano, qeto e ile ea ba hore mookameli oa bofofisi o nepile ka ho emisa lipolomiti tsa nakoana eaba ho thoe merafo e hlalosetsoe tsela ea tšebetso tabeng ea phano ea lipolomiti. Merafo e bile ea laeloa ho ikobela qeto eo.” Ke Nkotsi eo.
O boletse hore ka la 23 Pherekhong 2023, ba ile ba hlokomelisa ‘muso hore ho tsoela pele ho fa lik’hamphani tsa bofofisi tsa melata lipolomiti ke tlolo ea molao. O toboketsa hore ba ile ba elellisoa ‘muso hore Mohahlaula e tla batla matšeliso ho ‘muso ha e ka lahleheloa ke kuno ha lifofane tsa melata li fuoa lipolomiti.
“Leha ho le joalo, re ile ra hlolloa ho fumana hore letona la lipalangoang la ‘muso oa kajeno le fane ka lipolomiti tsa bofofisi ho k’hamphani tsa melata tsa lifofane ka litsela tsa bobolu ho tloha ka la 25 Pherekhong 2023.”
Nkotsi o bontša hore ka lebaka la phano ea lipolomiti tseo ka bokunyata ke ‘muso, Mohahlaula e lahlehetsoe ke M10 milone ho tloha ka 25 Pherekhong hofihlela la 28 Tlhakubele 2023 feela.
O phethetse puo ea hae ka ho supa hore ba hlahletse nyeoe ba tseka phano ena ea lipolomiti ka bokunyata.
“Nyeoeng eo ea botlokotsebe ,re qosa merafo e latelang, Letšeng Diamond, Storm Mountain Diamond, Mothae Damonds, Liqhobong Diamonds hammoho le Lefapha la Bofofisi.
Re boetse re ngolletse komiti ea paramente e lisitseng lihloliloeng lengolo la tletlebo mabapi le taba ena.” Ho phethela Nkotsi.
