MATEKANE O TŠEPISA MASOLE A TSOANG MOZAMBIQUE M100 000
La 20 Motšenong 2023
A bua tšebeletsong ea phahamiso ea masole a bileng koetlisong ea bookameli liahelong tsa sesole Makoanyane maobane, tona-kholo Ntsokoane Samuel Matekane o phatlalalitse hore ‘muso oa hae o entse qeto ea ho leboha masole a 120 a ileng a khutla ntoeng Mozambique hore pele khoeli ena e fela bao ba tlo fuoa teboho ea M100 000 lesole ka leng.
Masole ana ke a ileng a romelloa Mozambique ka Phato 2021 eaba a khutla ka Phuptjane 2022 e le ha a phomotsoa ke a mang a ileng a romeloa Mozambique.
Babali ba tla hopola hore tona-kholo mohla a amohelang masole a tsoang Mozambique a le Makoanyane ka la 16 Tlhakubele o ne a tšepisi masole hore ‘muso o ntse o itlhopha ho ba lokisetsa teboho ‘leha mokotla oa ‘muso o le masoba. O ne a re masole a tle a mohele bonyane boo a tla bo fuoa kaha sejo senyane ha se fete molomo.
Masole a tsoang Mozambique
Rea mo qotsa: “Re tla bona hore na khoeli ena ea bone kapa ea bohlano re tla ba leboha joang empa nke ke ka bolela hore na re tlo ba leboha ka Maloti a makae. Khoeli ea bone kapa ea bohlano e se ka ba ea fela litšepiso tsena li e-s’o phethahale.
Ho sa le joalo, maobane Matekane o boletse hore na masole a tlo fuoa chelete e kae.
“Kajeno ke motlotlo ho phatlalatsa mona hore masole ane a bo-rona a 120 a ileng a ea thusetsa Mozambique ntoeng ha bana ba thari ba tsohelane matla, ‘muso oa Motlotlehi o lumellane botsamaising ba ka hore batho bao ba 120, khoeling eona ena (ea Motšeanong), e se ke be ea fela tšepiso ena e sa phethoa.
“E mong le mong oa bona o lokiselitsoe lekholo la likete (M100 000) ‘me chelete eno ba tla e fumana khoeling eona ena.” Matekane o itsatso maobane.
O bile a ipiletsa ho molaoli oa sesole hore a bone hore sechaba se ea sireletsoa, a ipiletsa ho sechaba hore ha litaba li le teng, ekakhona ho luloe fatše ho shebisanoe kaha bora le ho tsohelana matla li tsoala lipolaeano tse jeleng setsi.
