MAPOLESA A RANTHANYA PELO EA MOLEBO
… O TIMETSE
Ka moqolotsi oa rona
Lelapa la Molebo le re mora oa lona, Tumelo Molebo (22) oa Sekamaneng Berea, o ile a felloa ke bophelo ka Moqebelo oa la 28 ‘Mesa 2023 kamora ho thunngoa ke mapolesa a neng a le patlong ea hae a mo belaella ka ho qhaka ha motho ‘moho le bo-mphato oa hae.
Pelaelo ea sepolesa ke hore Tumelo o ile a tšola tlhako morong nakong eo a tsongoang ke mapolesa kamora ketsahalo.
E mong oa lelapa o hlaloselitse moqolotsi oa rona hore mapolesa a ne a ntse a tsoela-pele ka lipatlisiso ho fumana Tumelo.
“Ho bonahala Tumelo o ile a fihla hae bosiu ‘me mapolesa a rotha lapeng ha bo.”
“Tumelo ha a utloa mokutu (oa mapolesa) o ile a betseha ka fensetere a leka ho hlanola tlhabela empa ka bomali-mabe e mong oa mapolesa o ile a mo bulula ka sethunya se ileng sa mo khaolela litšiu tsa bophelo.” Oa lelapa o hlalosa joalo.
Setho sena sa lelapa se bontšitse pelo ea sona e tletse mahloele ebile ho fihlile tlhokomelong ea hae hore mapolesa a kubuta taba ea lefu lena ka le reng ngoana oa bona o shoele nakong eo a neng a leka ho tseka sethunya le e mong oa mapolesa.
“Mapolesa a se a re ngoana o thuntsoe ke kulo e ileng ea betseha sethunyeng nako eo a tsekisanang sethunya le lepolesa.” Ke moamani ka pelo e bohloko.
O tsoetse-pele ho bontša hore leha ho le joalo, tlaleho ea ngaka kamora tlhahlobo ea setopo e bontšitse ha mofu a thuntsoe sefubeng ebile a hlenhlane sefuba le pelo. Kahona o re o fumana sena e le polao ka maikemisetso. O supile hore haeba mapolesa a ne a batla ho mo tšoara, a ka be a mo thuntse bonyane maotong e seng sefubeng.
Ha a fera litaba tsa hae o re leha ho le joalo, ho latela tsela eo mapolesa a buang le bona ka teng ba fumane ho se molemo ho tsoele-pele ka ho bula nyeoe khahlanong le ‘ona kaha hoo e le ho tšela letsoai maqebeng ao ba ntseng ba okana le ‘ona.
A re ke ‘nete ngoana oa bona o ne a etsa liketso tse soto empa ho bohloko ho bona ha a se a khaoletsoe litšiu tsa bophelo ka tsela e mahlonoko ena.
