‘MAPOLESA A FENETHELA KATISO SETOKISING’ – LELAPA
Ka moqolotsi oa rona
La 29 Phato 2023
Mohlankana oa Butha-Buthe, Katiso Justice Makoa, o tlalehoa a ile a bitsetsoa sepoleseng sa Butha-Buthe ka pelaello ea tlolo ea molao ka la 5 Phato 2023. Ka bomali-mabe ha a ka khutla a phela. Sepolesa se ile sa tsebisa lelapa hore o timetse a le ka setokising. Ho ea ka lelapa, tlaleho ea sepolesa e supa ha mofu a ile a ipolaea ka ho inoesa chefo ka setokising.
Ho sa le joalo, lelapa le re tlaleho ea tlhahlobo ea setopo ea ngaka e bontša sesosa sa lefu e le ho tokhotsoa hoo mali a rothetseng bokong.
Ha litaba li le mothating ona, Khethang Makoa e leng moholoane oa mofu o laetse akhente ea hae, Adv. K.E Nhlapo ho ngolla Mookameli oa Sepolesa, Holomo Molibeli, moo a batlang matšeliso a M1,000,000.00 ka lefu la moena oa hae.
“Benghali, ke ‘muelli oa molao oa Khethang Makoa. ‘Muelloa oa ka o batla matšeliso ka lefu la ngoan’abo, Katiso Justice Makoa ea fenethuoeng ka sehloho ke mapolesa a hau a Butha-Buthe ka la 5 Phato 2023.
“‘Muelloa oa ka o mpolella hore ngoanabo o ile a hlokofatsoa hampe ka tsela e se nang botho ‘me seo se bakile lefu la hae.
“Ha ‘muelloa oa ka a botsa sepolesa sa Butha-Buthe hore moen’ae o jeoe ke eng, mapolesa a itse o inoesitse chefo a le ka setokising. Sena ‘muelloa oa ka o bona e le boitšireletso feela le maqiti a sepolesa ho pata sesosa sa lefu la ngoanabo.” Ke lengolo la akhente leo.
Mofu Katiso Justice Makoa, lelapa le re o fenethiloe ke sepolesa [Image – Facebook]
“Taba ea pele ke hore chefo e ke ke ea lutla ea kena ka setokising sa sepolesa. Ha ho na lebaka la hore Katiso a inoese chefo a ipolaee empa ba neng ba batla ho ‘mona a shoele ke mapolesa a Butha-Buthe.
“Taba ea mantlha ke hore tlaleho ea tlhahlobo ea setopo e hanana le tlaleho ea mapolesa ea hore mofu o balauoe ke chefo.
“Ha ‘muelloa oa ka a il’o tseba setopo, o mpolella hore nakong eo a se hlahlobang o bone maqeba a bulehileng setopong sa ngoanabo ke ka hona a se nang qea-qeo hore o khakhathuoe ke mapolesa ha a tla lahleheloa ke bophelo.” Adv. Nhlapo o rialo.
O boetse o supa lengolong hore ka thoko ho mona, ho na le mabaka a mang a mangata a pakang hore mofu o fenethiloe ka sehloho ke sepolesa.
“Ke laeloa mona ke ‘muelloa oa ka ho batla matšeliso a M1,000,000.00 ho uena ka polao ea moena oa ‘muelloa oa ka. Ho feta mona, ‘muelloa o batla hore mapolesa a neng a theohetse shoalaneng ea la 5 Phato 2023, u a nkele likhato tsa molao.
“Ke u fa matsatsi a 30 hore u be u arabile lengolo lena kapa u lefile matšeliso a tekiloeng eseng joalo, ke tlo hloka boikhethelo ‘me ke tla mathela makhotleng a molao ho ea kopa thuso teng.” O phethela litaba tsa hae joalo Adv. Nhlapo, lengolong le ngotsoeng maobane.
