MAHAO O RE BA ‘MUSO BA HIRA MALAPA A BONA FEELA
Ka Moipone Makhemeng
La 8 Phuptjane 2023
Moetapele oa mokha oa Basotho Action Party (BAP) Prof. Nqosa Mahao o bile le ‘moka oa baphatlalatsi maobane moo a thathamisitseng baamani ba matona le tona-kholo ba fuoeng mosebetsi ke ‘muso.
Mahao o bontšitse hore boiketong ba likhetho, Revolution for Prosperity (RFP) e ile ea itlama ho ba litsebe le leihlo la Basotho ho bona hore puso e khethiloeng e tsamaea ka thello le ho tlisa liphetoho.
Leha ho le joalo, Mokhoele o re ba tšoenyehile hoba ‘muso o shebahala o fetohetse litšepiso tseo o ileng oa li etsetsa Basotho.
Puong ea hae, o hlakisitse hore tšepiso ea RFP e ne e le ho hloekisa puso hore e-be matsohong a batho ba hloauoeng ho ipapisitsoe le boiphihlelo ba bona bo nang le ponaletso.
O re empa seo ba se bonang pusong ena ke hore khomo e buthile setheng kaha kabo ea mesebetsi e fuoa ba malapa a matona feela.
Prof. Mahao le komiti ea BAP
E le ho netefatsa litaba tsa hae, Mahao o ile a teka bopaki hore botong ea Lesotho Electricity Company (LEC) ha ho’a etsoa phatlalatso ea likheo tse teng empa ho se ho ropoha mabitso a akhang ‘Masofia Letšabane.
Ho boetse ho na le Teboho Shelile eo eena e leng moena oa letona la Lekala la Likhoebo tse Kholo, Mokhethi Shelile ‘me le eena o hlaha e se e le setho sa boto ea LEC. Ho feta mona, o boetse a bontša ‘muso o lokollotse phatlalatso moo mofumahali Mpeo Mahase-Moiloa e seng e le molula-stulo oa Komisi ea Bosebeletsi ba Sechaba (Public Service Commission) ‘me eena o hlalosa e le moamani le letona la Khiro le Bosebeletsi ba Sechaba – Richard Ramoeletsi.
Ha a tsoela-pele Mahao o boetse a supa hore Lesotho Housing and Land Development Corporation, e mong oa lingoetsi tsa Tona-Kholo, o petlentsoe moo ho se na phatlalatso hore likopo tsa mosebetsi li akheloe ke Basotho ba bang.
Hape re ntse re le lapeng la tonakholo, Mahao o boetse o totobatsa ha ho hlahella hore botong ea Lesotho National Development Corporation (LNDC) ho bonahala ngoetsi e ‘ngoe ea tona-kholo – ‘Mamotake Matekane e se e le setho.
Ho sa le joalo, Mahao o hlalosa kabo ea mesebetsi e ajoa seueso-ueso sa malapa. Mapaki ao a faneng ka ‘ona ntlheng ena ke moo a bontšitseng hore lefika le ileng la theteha thabeng ea Mpilo mosebetsi oa ho le hleka ka ‘mileng o ile oa fuoa moena oa tonakholo. Mahao o rapalalitse hape hore ho na le tsekisano ea mosebetsi oa ho tsamaisa Selakhapane sa Sechaba eo a reng ‘muso o fihlile oa o emisa ka refi hang ha o fihla, lehoja o ne o se o le tseleng ea kabo.
O re leha ho le joalo, libeke tse peli tse fetileng Lekhotla la Namolo ea Likhang le fane ka qeto ea hore mosebetsi oo o tsoele-pele. Ke mona moo a itseng tse ipetsang-pele, li kuma mosebetsi oa ho tsamaisa selakhapane o tlo abeloa mora le moena oa tonakholo.
Ha a thetha litaba tsa hae, Mahao o supa hape hore o hlokomela mafapha a ikemetseng a bonahala a imatahanya le matona. O re ke phoso ebile ke moo metso ea bobolu e ka runyang teng.
