MAEMO A HLOBAETSA SEPETLELENG SA ‘MAMOHATO
Ka Moipone Makhemeng
La 9 Mots’eanong 2023
Maemo a litšebeletso tsa kalafo ea bakuli Sepetleleng sa Sehopotso sa Mofumahali ‘Mamohato a tlalehoa a putlame kajeno.
Baoki le basebetsi ba bang sepetleleng seo ba ngalile mosebetsi ho tloha maobane hoba ba e-s’o amohelisoe meputso ea bona ea khoeli ea ‘Mesa. Raliphatlalatso oa Sepetlele seo, Mofumahali ‘Makananelo Sepipi a buisana le Leihlo la Basotho o netefalitse hore maemo a joalo.
“Ha se hore ho na le seteraeke mona empa basebetsi ba ngalile mosebetsi; ba ikhethetse ho lula malapeng (hoba ba e-s’o lefshoe meputso ea ‘Mesa). Leha ho le joalo, ho ntse ho thusoa bakuli ba tšohanyetso e leng ba likotsi ‘me hara bao ho na le ba ntseng ba kena sepetlele.
“Ha ke tsebe hantle hore na libethe li tletse kapa che boemong bona empa re ntse re lokolla bakuli ba bangata kaha palo ea baoki le lingaka tse ntseng li fana ka thuso e fokola haholo.
“Ho ntse ho bonoa bakuli ba fokolang, empa haholo re shebile bakuli ba tlokotsing le ba libetheng.” Sepipi o li beha joalo.
O boetse a hlalosa hore Lekala la Bophelo ha le e-s’o etse letho ka boemo bona, kaha le e-s’o buisane le basebetsi ka boemo ba tiehiso ea ho lefshoa.
Sepetlele sa Sehopotso sa Mofumahali ‘Mamohato hajoale se ikarabella ho ‘muso oa Lesotho kamora hore o khaole maqhama le k’hamphani e neng e se tsamaisa, Netcare ka 2021.
Liteko tsa ho fumana lehlakore la Letona la Bophelo, Selibe Mochoboroane li fololitse kaha a sa araba mohala oa hae.
