LNDC E TLISA ISUZU MOTORS LESOTHO
Ka Moipone Makhemeng
La 27 Phupu 2023
Koporasi ea Ntšetso-pele ea Moruo (Lesotho National Development Corporation – LNDC) maoba ebile le ‘moka oa bo-ralitaba moo taba-kholo e neng e le ho phatlalatsa moralo o mocha oa tšebetso oa 2023/24 -2027/28.
Ea tšoereng molepo e le mookameli oa LNDC, Adv, Molise Ramaili o ile a phatlalatsa hore ba tlabotse selekane le k’hamphani e hlahisang makoloi, Isuzu Motors ho hlaha Afrika Boroa ho tla sebetsa Lesotho. O boletse ha ba kentse linala fatše ho mema bo-ramatsete ho tla tsetela Lesotho.
“Botseteli boo re tlo bo kenya tšebetsong bo tlo leka ho nyolla moruo oa naha ka tsela ea ho thusa bahoebi ho fumana khahlametso ea lichelete ha ba qala likhoebo tsa bona. Re tlo leka hape ho phahamisa litaba tsa limmaraka hore li kenelle ho bareki ka ho pharalla. Bothata boo re le naha esale re tobana le bona ke ho atametsa batseteli ba matla ho tsoa kantle ho naha.
Leha ho le joalo, re ntse re na le batseteli ba lehae ba nang le litsebo le mahlale empa qholotso e kholo ke lichelete ho bona hore ba ka kenya tšebetsong litaba tsa bona joang. Re le LNDC re tlo bona hore re koala khea eo ho bona hore bahoebi ba thusoa ka lichelete ho nyolla likhoebo tsa bona. Re tlo sebetsa le mafapha a mang ‘me re tla ba bitsa re bue le bona. Ka ho khetholoha, re tlo thetsana ka mahetla le litsi tse itlhommeng pele ka botseteli hammoho le litsi tsa thuto, mafapha a boqapi le a mang.
“Re tlo sebetsa le k’hamphani ea Isuzu Motors ho hlaha Afrika Boroa, ’me k’hamphani ea lehae e bitsoang ZMG e ile ea khethoa e le eona k’hamphani eo re tla sebetsa le eona mokhahlelong ona. Re bona taba ea ho hlahisa makoloi e le ea bohlokoa naheng ena ‘me re tlo phethola lekote la tšebelisano-‘moho le Isuzu Motors hammoho le Zakhura Motor Group (ZMG) ka la 2 Phato 2023. Tsatsing leo re tla boela re thakhole moralo oa rona o mocha.
Re batla hore lefapha la tlhahiso ea makoloi le tlo hlahisa mesebetsi kahara naha ena. Re boetse re shebile ho tla phahamisa tšebetso mafapheng a temo le mahlale.” Adv. Ramaili o li beha joalo.
Ho sa le joalo, Mookameli oa Litšebeletso tsa Molao le Tsamaiso LNDC, Florence Motoa o khobotlile ka matla taba ea moralo o mocha o tlil’o thakholoa ka la 2 Phato 2023.
Florence Motoa, Mookameli oa Litšebeletso tsa Molao le Tsamaiso LNDC.
Motoa o boletse hore moralo oa tšebetso oa LNDC oa 2023/24 -2027/28 o tlo thakholoa ka sepheo sa ho ba le tšusumetso e ntle, e tšoarellang moruong oa Lesotho. O re sena se tobane le ho matlafatsa sechaba ho theha boleng ba lihlahisoa tsa Basotho mebarakeng ea machaba.
O totobalitse ha sepheo sa moralo e le ho shebana le ntšetso-pele ea moshoelella ea moruo e le ho hlahisa mesebetsi e meholo le mahlale a khoebo. O itse phano e ntlafalitsoeng e tlo thusetsa mafapheng a ’maloa.
Ho sa le joalo, Motoa o supile hore ho fihlela sepheo sena, koporasi e tla tsepamisa maikutlo ho tsetela likhoebong le litsing tsa boleng tse tla hlahisa mesebetsi haholo tlhahisong ea temo.
A fera ka hore ba qalile ho koetlisa le ho tataisa likhoebo tsa Basotho tse ‘ne ka mekhoa e nepahetseng ea ho etsa khoebo ba sa itšetleha ka batseteli ba hlahang ka ntle ho naha.
