LINGAKA LI THAKHOLA SETERAEKE
Ka Moipone Makhemeng
La 30 Phupu 2023
Mokhatlo oa lingaka (Lesotho Medical Association-LMA) o lokollotse tsebiso hore ho tloha hosane ka la 31 Phupu 2023, lingaka li tlil’o ngala mosebetsi naha ka bophara.
Lingaka li tseka ho behelloa ka thoko ho mosebetsi hoa litho tse ling tsa mokhatlo ke Lekala la Bophelo. Li boetse li tseka litsiane tseo lekhotla le laetseng hore lekala la bophelo le li lefe. Beke e fetileng lingaka li ile tsa tšosa ka hore ha li na sebeletsa bakuli ba tlang ngakeng ba khutla, ka lebaka la ho behelloa ka thoko ho mesebetsi hoa litho tseo.
Mookameli oa LMA, Dr. Ramafikeng o re ka Mantaha oa la 31 Phupu 2023 ha Lekala la Bophelo le sa hule qeto ea ho behella litho tseo ka thoko ho mosebetsi, lingaka naha ka bophara li tl’o beha lifocholo fatše.
Ho ea ka lengolo, qaka e ropohile mabapi le ho se lefshoe meropotso hoa lingaka ke Lekala. Dr. Ramafikeng o beha Lekala la Bophelo molato ha maemo a ritselitse mothating ona.
“Ho lokela ho hlaka hore Lekala la Bophelo ke lona feela le ikarabellang bakeng sa ho putlama hoa litšebeletso lekaleng. Lekala le tsoela-pele ho se natse bophelo ba Basotho ka ho itebatsa boikarabelo ba lona. Lingaka esale li hlakile, Lekala la Bophelo le tlameha ho lefa lingaka seo li se kolotoang ho latela taelo ea lekhotla. Maqheka ana a litšoso a ke ke a sebetsa.” Lengolo lea hlalosa.
Ho sa le joalo, Lekala la Bophelo le ntšitse polelo mabapi le seteraeke se lohothoang ke lingaka. Le lomahantse meno ho hlokomelisa lingaka ho nyahlatsa mohopolo oo ka le reng li hopole boitlamo ba tsona ba ho beha bophelo ba bakuli pele ho litakatso kapa lithahasello tsa tsona.
Mabaka a behoang ke Lekala mabapi le ho laela lingaka ho nyahlatsa mohopolo ke hore seteraeke seo se ka thoko ho molao. Ho feta mona, lingaka ha li’a lumelloa ho hula matsoho a tsona tšebetsong ho latela molao kaha li fana ka litšebeletso tsa mantlha tsa bophelo.
Lekala le re haeba le tsoile tlaase litumellano tsa konteraka, lingaka li lokela ho hlahlela khang e joalo makhotleng a molao hobane taba eo ba e tsekang ke tokelo ea bona (dispute of right) ha se tabatabelo (dispute of interest). Kahona ha li na tokelo ea ho hula matsoho a tsona ho beha bophelo ba Basotho tsietsing.
Ho feta mona lekala, le re ke nako e telele lingaka tsa Basotho li sa sebeletse sechaba ka nepo ka lebaka la hore ha li e-s’o lefuoe litsiane tsa ho theohela kamora lihora tsa tšebetso leha lekala le li tihiselitse ka makhetlo hore litsiane tse joalo li tlil’o lefshoa ho ikobela kahlolo ea lekhotla la molao oa motheo ea nomoro 19/2019.
Lekala le lemosa lingaka hore le fihletse qeto ea ho kenya litsiane tse amehang moralong oa selemo sa lichelete sa 2023/2024 le ho patala lingaka tse ntseng li theohela kamora lihora tsa tšebetso.
“Lingaka tsohle li laeloa hore ka Mantaha oa la 31 Phupu 2023 ka 8am li itlalehe mesebetsing ea tsona ntle le phoso. Lingaka tse tla sitoa ho phethahatsa kapa ho ikobela litaelo tsena, Lekala la Bophelo le tla li nkela likhato tsa molao ho latela melao le melaoana ea khiro le bosebetsi.” Phatlalatso ea lekala la bophelo e rialo.
