LINGAKA LE BAOKI BA NGALA MOSEBETSI
Ka Moipone Makhemeng
La 5 Motšeanong 2023
‘Mamekhatlo oa mekhatlo ea bahlanka ba bophelo e leng lingaka, baoki, batsoaki ba litlhare le bang, Coalition of Health Professionals, o re ho tloha hosane, bahlanka ba bophelo ba tlo ngala mesebetsi lipetleleng le litliliniking tsa ‘muso le tsa likereke.
Ho ea ka phatlalatso e lokollotsoeng ke setlamo sa mekhatlo kajeno, lebaka la mantlha la ho ngala mosebetsi ke hore ‘muso ha o e-s’o lefe basebetsi bana meputso ea khoeli ea ‘Mesa.
Setlamo sa mekhatlo ea bahlanka ba bophelo se bopiloe ka mekhatlo ea latelang: Lesotho Medical Association (LMA), National Environment Health Association of Lesotho (NEHAL), Pharmaceutical Association of Lesotho (PSL), Qiloane Nursing Assistants Association of Lesotho (Qinuasa), Clinical Anaesthetics Association of Lesotho (CAAL) le Emergency Care Council of Lesotho (ECCL).
“Re masoabi ho tsebisa sechaba hore ho tloha hosane ka Labohlano la 5 Motšeanong 2023 ha re na itlaleha mesebetsing ea rona ka lebaka la meputso ea rona e-s’ong ho lefshoe ea khoeli ea ‘Mesa. Ha ho’a ba bobebe ho fihlela qeto ena empa Lekala la Bophelo le re khannetse ho etsa tjena.
“Taba e re makatsang ke hore lekala ha le re hlalosetse letho mabaka a etsang hore re sitoe ho fumana meputso ea rona.
“Re qetetse ho lefshoa ka la 16 ‘Mesa 2023 empa lekala le hlotsoe ho phetha boitlamo ba lona kaha ha le e-s’o re hlalosetse hore na ha re ea khola molato.
“Bophelo ba litho tsa mokhatlo oa rona bo lutse holima meputso ea tsona. Taba ea ho se ba lefe e bakile hore ba bang ba bona ba tebeloe malaeneng moo ba lulang ‘me ba hula ka boima bo tšabehang.
“Re kopa sechaba seo re se sebeletsang se re inele matsoho metsing ka tšetiso e tlil’o bakoa ke ho ngala mesebetsi. Leha ho le joalo, re tšepa hore lekala le tla lokisa boemo bona ka nako hore re tsebe ho khutlela mesebetsing ho ea thusa sechaba ka litšebeletso tsa bophelo.
Ho sa le joalo, Leihlo la Basotho puisanong le motlatsi oa phala ea setlamo sa mekhatlo, Dr Mojakisane Ramafikeng o fane ka tlhakiso hore qeto ena e se nkoe e le seteraeke kaha ha se sona empa basebetsi ba se na mekhoa ea ho fihlela mesebetsing, ba boetse ba se na lijo ha ba bang ba hloka bolulo kaha ba lelekuoe malaeneng.
Dr. Ramafikeng ha a fera o bontšitse litaba tsena li utloisa bohloko ka mokhoa o tebileng, a eketsa ka ho beha hore: “’Muso ona ke utloa e le o khopo hore na ha o sa lefe batho ba sebetsanang le bophelo o lebeletseng?”
Ka lehlakoreng le leng, phala ea Lekala la Bophelo, ‘Mateboho Mosebekoa, o re le eena e le mohlanka oa ‘muso Lekaleng la Bophelo le eena ha e-s’o fumane moputso oa hae ‘me o ntse a maketse joalo ka mokhatlo ona kaha le bona ha ba e-s’o hlalosetsoe hore meputso ea bona e faretse kae. “Ha ke e-s’o bone phatlalatso eo ‘me ke tla sitoa hore letho, empa ke kopa u nthomelle eona phatlalatso eo hore ke tsebe ho botsa beng ba ka.” O rialo.
