LESOTHO LE TLA AMOHELA MECHINI HO HLAHA JAPAN
Ka Moipone Makhemeng
La 31 Tlhakubele 2023
Kompone ea Tokushukai Medical Group ho hlaha toropong ea Tokyo naheng ea Japan e tla nehelana ka mechini e hlatsoang liphieo (Dialysis) e mashome a mabeli kahare ho lipetlele tse peli tsa ‘muso, e leng Queen ‘Mamohato Memorial Hospital le Mafeteng Hospital.
Puisanong le ofisiri ea liphatlalatso Lekaleng la Bophelo mofumahali ‘Mamolise Falatsa, o bontšitse hore ho ile hoa ba le baeti ho hlaha Japan ba neng ba tlile ho tla hlahloba litsi tsa bophelo moo mechini ena e ka kenngoang teng.
Falatsa o hlalositse hore sepetlele sa Queen ‘Mamohato Memorial Hospital ho na le bothata boo ba thulaneng le bona ba sebaka sa ho kenya mechini e joalo ‘me a re hajoale ba sa sebetsana le ho bona hore na ba ka fenya bothata bona ba sebaka joang.
Falatsa o bontšitse hore mechini e leshome e tla lebisoa Mafeteng ha e leshome e tla sala Maseru.
