LESOTHO LE TIISA LEANO LA TS’IRELETSO EA BOQAPI
Ka Moipone Makhemeng
La 5 Mphalane 2023
Lekala la Toka, Molao le Litaba tsa Paramente le bile le thupelo ea ho netefatsa leano la ts’ireletso ea thepa ea boqapi (intellectual property policy and strategy) bekeng ena hoteleng ea Maseru Avani ka ts’ebelisano ‘moho le World Intellectual Property Organisation (WIPO).
Ho ea ka Mongolisi-Kakaretso mofumahali ‘Mamoretlo Mohapi ka Mphalane 2007, sebokeng se akaretsang sa WIPO, ho ile hoa thehoa Lenaneo la Nts’etso-pele ho kenyelletsa letoto la likhothaletso tse 45 tse reretsoeng ho ntlafatsa boemo ba nts’etso-pele ea mesebetsi ea mokhatlo.
‘Mamoretlo Mohapi – Mongolisi-Kakaretso
Maletsunyane Mpesa
Mohapi o re WIPO e ile ea kenya matsapa a fapaneng a ho thusa linaha tseo e leng litho tsa eona haholo-holo linaha tse ntseng li tsoela-pele ho una molemo ho tsoa ho tsamaiso ea thepa ea boqapi.
O supa hore ke ka lebaka lena ‘muso oa Lesotho o ileng oa kopa thuso ea sethekhiniki (technical assistance) ho WIPO, bakeng sa ho nts’etsa-pele leano la ts’ireletso ea thepa ea boqapi (National Intellectual Property) ‘me eona ea ikopanya le sehlopha sa litsebi ho thusa Lesotho le ho hokahanya ts’ebetso e qalileng ka Loetse 2022, ka tlhahlobo ea litlhoko tsa lona. O tsoetse-pele ho bonts’a hore sehlopha seo se ile sa ngola National Intellectual Policy eo kajeno e neng e tlil’o sekoasekoa le ho netefatsoa.
Ho sa le joalo, Mongoli e Moholo oa lekala le seng le boletsoe monghali Lira Ralebese kamora ho fetisa liteboho tsa hae o bonts’itse ba le motlotlo hore ebe motsamaisi e moholo oa WIPO o khethile Loretta ho etella mosebetsi ona pele. A supa hore ka boiphihlelo ba hae le sehlopha se matla sa litsebi tse sebetsanang le WIPO mabapi le mosebetsi ona, ba na le ts’epo ea hore pele selemo sena se fela, Motlatsi oa Tonakholo le Letona la Toka, Molao le Litaba tsa Paramente, Nthomeng Majara o tla thakhola leano la pele la Naha la Intellectual Policy bakeng sa ‘Muso oa Lesotho. Ralebese o boetse a supa hore ‘Muso oa Lesotho o itlama ho phethahatsa likhothaletso tse tlang ho fanoa.
“Ho theosa le lilemo, Lesotho le ‘nile la una molemo ka thuso ea WIPO mabapi le technical assistance ntlheng ea nts’etso-pele ea Intellectual Property libakeng tse fapaneng ho kenyeletsa ntlafatso ea batho le meaho. Ho fana ka leselinyana, ka phaposing ena re na le bajalefa ba ‘maloa ba lenaneo la Master’s Degree in Intellectual Property, le ts’ehelitsoeng ka lichelete ke WIPO le African Regional Intellectual Property Organisation (ARIPO) le lithuto tse ling tsa nakoana tse fanoang ke WIPO Academy.” Ralebese o fana ka nalane joalo.
Ho sa le joalo, o ile a otlolla hore mehleng ena moo tsebo e leng senotlolo sa nts’etso-pele, bohlokoa ba ts’ireletso ea boqapi bo eketsehile.
“Boqapi bo thusa ho theha mesebetsi, ho hohela bo-ramatsete, ho ts’ehetsa likhoebo le bo-rakhoebo hammoho le kholo le nts’etso-pele ea naha efe kapa efe.” O thatiselletsa joalo.
Ho phethela o ile a etsa khoelehetso hore bohle ba amehang ba kenye ts’ebetsong likhothaletso tse fanoeng molemong oa phetoho ea thepa ea boqapi naheng ea Lesotho.
Emmanuel Rugomboka, WIPO
Ke sethaleng sona sena moo moemeli oa motsamaisi e moholo oa WIPO monghali Emmanuel Rugomboka, a ileng a bonts’a hore lefats’e le fetohile ka lebelo le sa lebelloang ‘me bokhoni ba rona ba ho lekanya matla a boqapi ho bohlokoa lefats’eng. Rugomboka a re ka lebaka leo, leano la naha la ts’ireletso ke leano le letle bakeng sa WIPO le ‘muso oa Lesotho ho matlafatsa ts’ebelisano-‘moho le ho hloaea merero e kopanetsoeng ho khothaletsa ts’ebeliso ea IP bakeng sa ho nyolla moruo. O re sena se tla fetoleloa ho kenngoeng ts’ebetsong ha moralo oa naha.
“Ka pono ea matsatsi a ‘maloa a tlang re tla kena leetong la kopanelo la ho hlahloba, ho seka-seka le ho netefatsa leano la pele la naha le tla chorisa bokamoso ba sechaba sena sa tikoloho ea boqapi.” O lihela likhala joalo.
